14-15 naýryz kúnderi Ál-Farabı atyndaǵy Qazaq ulttyq ýnıversıtetinde Qazaqstan Respýblıkasy Táýelsizdiginiń 25 jyldyǵyna arnalǵan «Stýdenttik kóktem-2016» baıqaýynyń aqtyq syny bolyp ótti. Alǵashqy kúni stýdentter bı nomınasıasy boıynsha baqtaryn synasa,  15 naýryzda án baıqaýy men mýzykalyq aspaptarda oryndaýshylar saıysy oryn aldy. Bul týraly «Qamshy» portaly QazUÝ baspasóz qyzmetine silteme jasap habarlaıdy.

«Stýdenttik kóktem-2016» baıqaýynyń basty maqsaty – stýdentterdiń shyǵarmashylyq qabiletterin shyńdaý, olardy tek bilim men ǵylymǵa ǵana emes, ónerge baýlý, talanttardyń tanylýyna yqpal etý bolyp tabylady. Táýelsizdiktiń 25 jyldyǵyna oraı uıymdastyrylyp otyrǵan bul «Stýdenttik kóktem» de dál osy maqsatta ótkizildi desek artyq aıtqanymyz emes.

«Stýdenttik kóktem-2016» baıqaýynyń alǵashqy kezeńine ýnıversıtet boıynsha 2000-nan asa stýdent qatysyp, onyń myńǵa jýyǵy kelesi kezeńge joldama alǵan bolatyn. Atalǵan baıqaýdyń alǵashqy kúninde  bı nomınasıasy boıynsha eki kezeńnen súrinbeı ótken bıshiler óner kórsetti. Qazirgi zamanaýı bı, patrıottyq fleshmob taqyryby  aıasynda bılegen jastardyń arasynda kórermenderge erekshe áser qaldyra bilgen fakúltet – hımıa jáne hımıalyq tehnologıalar fakúlteti boldy. Alaıda, júırikten júırik ozar jarysqanda demekshi, atalǵan fakúltetten geografıa jáne tabıǵatty paıdalaný fakúlteti de qalysqan joq. Osy oraıda, ózderin sahnada ásem kórsete bilgen mehanıka-matematıka fakúltetin de atap ótkenimiz jón. Atalǵan kúni barlyq fakúltet stýdentteri óz ónerlerin kórermenderge pash etip, olardyń ystyq yqylasyna bólendi.

«Stýdenttik kóktemniń» kelesi kúni jez tańdaı ánshilerge arnalǵan «Birge – kemel keleshekke!» atty án baıqaýy men «Táýelsizdik – tuǵyrym!» atty mýzykalyq aspaptarda oryndaýshylar baıqaýyna ulasty. QazUÝ ónerpazdarynyń talantyn tanyta túsý maqsatynda ótkizilgen bul baıqaýdyń ekinshi kúninde ádil-qazylar alqasynda qazaq estradasynyń  jaryq juldyzy  Merýert  Túsipbaeva,  «Qurmanǵazy» atyndaǵy ulttyq  konservatorıanyń  oqytýshysy Serik Pazylov,  «Gaýhartas» tobynyń solısi  Ásem Abdýalıeva,  «Arlan» tobynyń  solısi  Birjan Júnisbekov jáne ánshi  Bota Bısenova boldy.

          Ádemi árlengen sahna men kórermenderdiń ystyq yqylasy ónerpaz stýdentterdi de bir qýantty. Barlyq fakúltet bilimgerleri baq synap jatqan bul baıqaýda ásem án de shyrqaldy, keremet kúı de oryndaldy. Solardyń qatarynda, qulaqtan kirip boıdy alǵan ásem án usynǵan geografıa jáne tabıǵatty paıdalaný fakúltetiniń 1-kýrs stýdenti Sársenbekov Maǵjandy «Týǵan jer» ánimen, bıologıa jáne bıotehnologıa fakúltetiniń 1-kýrs stýdenti Tursynbaeva Samaldy «İzin kórem» ánimen, jýrnalısıka fakúltetiniń 2-kýrs stýdenti Túzelbaı Abaıdy «Otan ana» ánimen erekshe atap ótýge bolady. 

Saıysta qazaqtyń qara dombyrasyn kúmbirletken oryndaýshylar da az bolmady. Atap aıtsaq, fızıka-tehnıkalyq fakúltetiniń 1-kýrs stýdenti Zadygereev Álimjan,  shyǵystaný fakúltetiniń 1-kýrs stýdenti Tastanbekova Aıkúmis Qurmanǵazynyń «Adaı» kúıin naqyshyna keltire oryndady.  Odan ózge,  «Balbyraýyn», «Jeńis», «18 jasar Baljan qyz», «Saltanat», «Jumyrqylysh», «Kóroǵly», «Shattanamyn», «Jıma» ándi kúıler oryndaýshylardyń nazarynan tys qalmady.  Bul synda talantty jastar dombyramen qosa, qobyz, fortepıano syndy mýzykalyq aspaptarda da ónerlerin kórsetti.

          Osylaısha, kópten kútken «Stýdenttik kóktem-2016» baıqaýynyń fınaly da óz máresine jetti. Al júzden júırik, myńnan tulpar úzdik oryndaýshylar jýyrda bolatyn gala konsertte marapattalatyn bolady. Aqtyq synǵa súrinbeı jetken ónerpazdarymyzǵa sáttilik tileımiz.

Uljan IBRAIM