Áteshsiz de tań atady nemese Májilissiz óte shyqqan eki aı

Ata Zańǵa saı Májilis – bıliktiń tutas ta tegeýrindi bir tarmaǵy! Ol organsyz kez kelgen órkenıetti memlekettiń kúni qarań: zańdar qabyldanbaı qalady, úkimetke «áı, dep, qoı dep» qatqyl sóıleıtin qurylym bolmaı, eldi berekesizdik jaılaıdy. Basqasyn aıtpaǵanda, saılaýshylar ózderi qalap, saılap alǵan depýtattaryn saǵynyp, izdeı bastaıdy.

Al, bizde bolsa, rahat! Májilistiń óz-ózine qol jumsap, saıası sýısıd jasaǵanyna eki aıdyń júzi boldy. «Qaıran meniń depýtattarym! Arystaı meniń partıalarym!» dep, qaıǵyryp jatqan el de joq. Tipti, bılik Májilistiń janazasyn ózi shyǵarǵanymen, onyń qyrqyn berýdi de umytyp ketipti!

Áteshsiz de tań atady, onyń ústine bizdiń áteshtiń sol tańdy shaqyratyn daýysy da joq!

Sol sıaqty, osyndaı beıshara, ıa bar, ıa joqtyǵy sezilmeıtin Májilissiz de kádimgideı ómir súrýge bolady eken ǵoı. Májilissiz de ekonomıkamyz «qaryshtap» damyp jatyr, elbasynyń ózi baryp ashatyn gıpermaketter kún sanap kóbeıip jatyr! Elbasynyń saparlarynyń kezinde bir de bir azamat: «Nureke! Depýtattarsyz kúnimiz qarań eken! Sol ıgi jaqsylardy meılinshe tezirek qutty oryndaryna qaıta qondyryńyzshy!» dep ótinip te jatqan joq!

Prezıdent ákimshiliginiń quqyqtyq basqarmasy bar emes pe?! Depýtattardy saılap, júıkeni tozdyryp, qarjy shashyp, jurtty talastyryp qoıǵansha, sol basqarmaǵa zańdardy rásimdeý mindetin júktep qoısaq bolmaı ma?

Árıne, bul usynysym Ata Zańǵa qaıshy. Biraq bizde ondaı qaıshylyqqa kim qarap jatyr? Onyń ústine Konstıtýsıasyn eki-úsh mınýtta ózgerte salatyn el emespiz be?

Ámirjan Qosanovtyń Feısbýktegi paraqshasynan alyndy.