Elordada Naýryz meıramyna oraı halyqtyq serýender ótip jatyr. Mereke eki kún boıy toılanady, - dep habarlaıdy «Qamshy» portaly Astana qalasynyń resmı saıtyna silteme jasap.

«Astana-arena» stadıonynda ótken merekelik sharanyń bastalýyna Elbasy Nursultan Nazarbaev qatysyp, onda ázirlengen etno-aýyldy aralady.

«Osynaý izgi mereke Parlament saılaýyn ótkizý sharasymen qatar keldi. Qazaqstandyqtar bir úıdiń balasyndaı tutastyǵyn kórsetti. Halqymyzdyń osy birligi myzǵymaıtyn bolsyn. Bizdiń jasap jatqanymyzdyń bári qazaqstandyqtardyń keıingi urpaǵyna mura bolyp qalady. Bizdiń bolashaqqa aparatyn jolymyz zor jetistikter men Táýelsizdigimizdiń ıgilikteri arqyly jarqyrap turatyn bolsyn. Barsha tabıǵat jańarǵan Naýryz merekesinde adamdar árdaıym bir-birine degen ókpe-renishin keshirgen, muqtajdarǵa kómektesken, baqyt tilep, aǵash otyrǵyzǵan jáne bulaq kózin ashqan. Halyq bul kúni tilegen tilekter mindetti túrde oryndalatynyn aıtady. Men árbir shańyraqqa baqyt, shattyq shýaǵyn jáne bar jaqsylyqty tileımin, – dedi Qazaqstan Prezıdenti. 

Basty sharalardyń biri «Qazaq eli» monýmenti aldyndaǵy alańda ótti. Ádettegideı, kıiz úıler tigilip, sport jarystary uıymdastyryldy, altybaqan ornatylyp, konserttik baǵdarlama kópshilik nazaryna usynyldy.

«Jyl saıyn kıiz úıler tigip, baýyrsaq taratamyz, naýryz kóje men qymyz usynamyz. Kıiz úılerde dastarhandar jaıyldy. Eń basty merekelerdiń biri - gúldený men halyq birigetin kún. Búgin qonaqtardy tańǵy saǵat 8-den bastap qarsy alýdamyz. Úlken-kishiniń barlyǵy kep jatyr», - dedi qalalyq basqarmalardyń ókilderiniń biri Aıman Shynbaeva.

Halyq arasynda kúres, gir sporty, armrestlıng, arqan tartý, asyq atý jarystary ótkizildi. Qalalyq mádenıet mekemeleri adamdarǵa merekelik kóńil kúı syılaýda. Jas teatr ártisteri astanalyqtardyń nazaryna taqyryptyq kórinister usynýda.

Merekelik sharalar «Báıterek» monýmentiniń aldyndaǵy alańda, sondaı-aq, qalalyq alańda da ótip jatyr. Qalalyq qyzmetter kıiz úıler tigip, tátti-dámdiler taratyp, sándik buıymdardy kópshilikke kórsetýde.

Aıta keteıik, elordada halyqtyq serýen erteń de ótedi. Merekelik sharalar «Stýdenttik» jáne «Jeruıyq» parkterinde, «Astana-Arena» stadıony janyndaǵy etnoaýylda, qalalyq alańda, Qazaq eli monýmentiniń jáne Báıterek monýmentiniń janyndaǵy alańdarda uıymdastyrylady.