Búgin jemqorlyqqa qarsy is-qımyl jónindegi Ulttyq búro qyzmetkerleri Aqparat jáne muraǵat komıtetiniń burynǵy basshysy Bolat Bersebaev pen onyń orynbasary qyzmetin atqarǵan Bek Arpabaevty tutqyndady. Burynǵy laýazymdy tulǵalardyń tutqyndalýyn Antıkorrýpsıalyq qyzmet ókilderi atyshýly «Mataev isimen» baılanystyryp otyr.
Ár jyldary túrli mınıstrlik pen agenttik túrinde qurylymdyq ózgeristerge ushyraǵan aqparat salasy joǵaryda atalǵan eki sheneýnik basqarǵan kezde (2010-2012 jyldary) Aqparat jáne baılanys mınıstrliginiń quramynda bolǵan.
Buǵan deıin Jemqorlyqqa qarsy is-qımyl jónindegi Ulttyq búronyń Almatydaǵy qyzmetkerleri aqparat salasyna bólingen memleket qarajatyn jymqyrý boıynsha qylmystyq is qozǵap, kúdiktiler retinde «Qazaqstan baspasóz klýby» QB men «QazTAG» JSHS quryltaıshysy Seıitqazy Mataev pen onyń uly Áset Mataevqa aıyp taqqan edi. Ulttyq búro olardy «QazTAG» pen «Ulttyq baspasóz klýby» QB arqyly aqparat, aqparattandyrý jáne baılanys komıteti men «Qazaqtelekom» AQ bólgen uzyn-yrǵaǵy 420 mıllıon teńge qarjy jymqyrdy dep otyr.
Atalǵan is boıynsha BAQ-qa túsinik bergen Ulttyq búro basshysynyń orynbasary Talǵat Tatýbaev aqparattyq saıasat salasynda qarjy jymqyrýǵa baılanysty isti bolatyndar sany ákeli-balaly Mataevtarmen shektelmeıtinin eskertken edi. Tatýbaev taýyp aıtypty, saılaý ótip, el ishindegi saıası ahýal qalypqa túse salysymen, aqparat quraldaryn qarjylandyrýǵa jaýapty bolǵan qos birdeı sheneýnikke quryq saldy.
Qolǵa túsken qos sheneýnik 2010-2012 jyldar aralyǵynda Aqparat jáne baılanys mınıstrligi quramyndaǵy aqparat jáne muraǵat komıtetin basqarǵan. Biri – birinshi basshy, ekinshisi onyń orynbasary bolǵan. Aqparat quraldary arqyly memlekettik saıasatty nasıhattaý boıynsha bólingen qarajattyń ıgerilýine jaýapty, jasalǵan kelisim-sharttar men qarjy aýdarymdaryna qol qoıǵan tulǵalar.
Jemqorlyqpen kúreskerler osy qarqynmen kete berer bolsa, aqparattyn saıasatqa qatysty basqa da kelisim-sharttardan «kinárat» tabýy ǵajap emes. Zańnamalar kepildik bergen sóz bostandyǵy men shyǵarmashylyq erkindikti kóp kórgen bılik osyndaı tásilmen biraz «tentekti» tyqsyryp alýdy oılasa kerek.
Jomart Abdollauly
