Oral qalasyndaǵy sulýlyq salonynda máskeýlik kosmetolog-dáriger Elvıra Iýsýpova salǵan ekpeden kóz jumǵan kelinshek Batys Qazaqstan oblystyq memlekettik kirister departamenti basshysynyń áıeli, al, sulýlyq salonynyń ıesi osy mekeme basshysy orynbasarynyń zaıyby bolyp shyqty, - dep habarlaıdy «Qamshy» portaly óńirlik BAQ-tarǵa silteme jasap.
NewTimes.kz basylymynyń jazýynsha, «Shyǵys juldyzy» sán salonynyń ıesi – oblystyq memlekettik kirister departamenti basshysynyń orynbasary Baýyrjan Qaıdarovtyń áıeli bolsa, salon qyzmetin paıdalanamyn dep kóz jumǵan 39 jastaǵy kelinshek Baýyrjan Qaıdarovtyń bastyǵy Amanjol Jaqanovtyń jubaıy kórinedi.
Salon ıesi Venera Qaıdarova.
Máskeýlik kosmetolog Elvıra Iýsýpova.
Sulýlyq salonyndaǵylar kisi ólimine sebep bolǵan ekpeni Máskeýden kelgen kosmetolog-dáriger Elvıra Iýsýpova salǵanyn habarlaǵan.
«Máskeýlik dáriger ıneksıa jasady. Salmas buryn aldymen, alergıaǵa áseri tekserildi. Eshqandaı alergıa bolmady. Biraq, ekpe salǵan soń kelinshek qurysyp qaldy, aýzynan kóbik atqylady. Biz birden jedel járdem shaqyrdyq. Bizdiń salonda jalpy mundaı ekpeler jasalmaıdy», - degen salon ákimshisi.
Osy oraıda, óńir turǵyndary ótken aptada atalǵan salonda 26-28 naýryz aralyǵynda máskeýlik kosmetolog Elvıra Iýsýpova qabyldaý júrgizetini týraly WhatsApp messendjeri arqyly habarlamalar alǵanyn aıtýda. Onda kosmetologtyń qandaı qyzmet túrlerin kórsetetini táptishtep jazylyp, keri baılanys úshin telefon nómiri kórsetilgen. Ol nómir salon ıesiniń telefony ekeni keıin anyqtalyp otyr. Salon qyzmetkerleri atalǵan habarlamany basshylarynyń bir-eki qurbysyna joldaǵanyn, máskeýlik dárigerdiń de osy salon ıesine qonaqqa kelgenin rastap otyr.
Esterińizge salsaq, keshe saǵat 12.25 shamasynda Oraldaǵy «Shyǵys juldyzy» sulýlyq salonynda 39 jastaǵy kelinshekke ekpe jasalyp, ekpe nátıjesinde kelinshek sol jerde jedel járdem jetkenshe kóz jumǵan bolatyn. Oblystyq densaýlyq saqtaý basqarmasyndaǵylar jedel járdemniń shaqyrylǵan meken-jaıǵa bes mınýt ishinde jetkenin, dárigerler barǵanda ekpe salynǵan kelinshektiń qaıtys bolǵanyn aıtyp otyr.
Aqparat quraldary qaıtys bolǵan kelinshektiń artynda úsh balasy qalǵanyn aıtýda.
Qazir Elvıra Iýsýpova ustalyp, quqyqqorǵaý organdaryna túsinik berýde.
