Almatylyq jezóksheler óz qyzmetterin jarnamalaý úshin áleýmettik jelilerdi paıdalanýda, - dep habarlaıdy «Qamshy» portaly.
Saın men Seıfýllın kóshelerin jyn oınaqqa aınaldyryp bolǵan almatylyq jezóksheler birer jyl buryn ǵalamtor keńistigin de «ıgere» bastaǵan edi. Qyzmetterin jarnamalaıtyn almatinki.com, almatinki.biz syndy arnaıy saıttar ashyp, onda tutynýshylaryna almatylyq túngi kóbelektermen jan-jaqty tanysý múmkindigi usynyldy. Saıtqa kirgen adam óz talǵamy men qaltasyna qaraı keregin tańdap kelgen kórinedi. Alaıda, atalǵan saıttar birneshe márte buǵattalyp, qyzmetine shekteý qoıylǵan soń qyzmetin birjolata toqtatypty.
Biraq, túngi kóbelekter saıt jabyldy dep qol qýsyryp otyrmapty. Búginde árkim esh kedergisiz paıdalanyp júrgen áleýmettik jelilerden akkaýnttar ashyp, toptar quryp, qyzmetterin odan ári jarnamalaýda. Ondaǵy jazbalardy kóz tartarlyq sýretterimen, arbaǵysh vıdeolarmen «kómkerýdi» de umyt qaldyrmaýda.
Áleýmettik jeli qoldanýshylary jezókshelerdiń bul «alqapqa» aýyz salǵanyna da biraz bolǵanyn aıtady.
«Baıqaýymsha, bular jarnamany «Drýg vokrýg», «Bado» saıttary, taǵy basqa tanysýǵa arnalǵan jeliler arqyly bastaǵan. Keıin bala-shaǵaǵa deıin qoldanatyn VKontakte sıaqty jelilerge de ashyqtan-ashyq ene bastady», - deıdi Murat esimdi jeli qoldanýshysy.
Shynymen de, qazir «VKontakte» jelisinde bir ǵana Almaty qalasynyń jezóksheleri jarnama ornalastyratyn, ataýy «Intım-Almaty» dep bastalatyn 50-den astam top bar eken. Munyń syrtynda, massaj qyzmetimen búrkengen toptar qanshama? Mundaı toptardyń bir-ekeýin elıtalyq jeli sanalatyn «Feısbýkten» de tabýǵa bolady.
Al, joǵaryda atalǵan «Drýg vokrýg» jelisindegi ıntımdik qyzmet usynatyn jarnamadan kóz súrinedi. Tipti, qyzdy-qyzdymen jezóksheler jappaı sms-habarlama taratý qyzmetine júgingen de kezder bolǵanyn aqparat quraldary birneshe ret jazǵan bolatyn.
Osyǵan deıin qoǵamdyq uıymdar men azamattyq belsendiler arnaıy organdarǵa jyn oınaqtyń jarshysy bolyp otyrǵan birneshe reseılik saıtty jabý týraly usynys jasaǵanymen, ol talap oryndalmaı keledi.
Osylaısha kóshede turyp tánin saýdalaýdan arlanbaǵan jezóksheler endi áleýmettik jeli arqyly da ózderiniń «elektrondy úkimetin» qalyptastyrýda.
Azamat Toqsanbaı
