Belgili jýrnalıs, qoǵam belsendisi, qaıyn atam Joldyǵul ÓTEGENOVke
 

Aqjaıyq ańyrady-aý qula beliń,
Qaıǵymdy janymdaǵy sura meniń...
Asqar taý kúńirenip, qaq jarylyp,
Súrinip, qulap ketti Qulagerim!..

Toqtamaı, tolǵaýymdy aqtaramyn,
Úırettiń aıyrmasyn aq-qaranyń.
Ákemnen erte ajyrap qalsam-daǵy,
Sen barda ákemdi men joqtamadym.

Ákemdeı qamqor boldyń jany jaqyn,
Jónim joq bura tartyp tarylatyn,
Alysqa uzańqyrap ketkenimde,
Óziń ediń aldymen saǵynatyn...

Ulyńdaı áńgime-syr quratynsyń,
Jaqsyny maǵan telip buratynsyń.
Áıteýir, jańa bolsa, jaqsy bolsa,
Maǵan ákep bergiń kep turatynsyń...

«Kóke» dep, kóńilińe qulyqty edim,
Qarsy aldyń jeńisimdi kúlip meniń...
Shýaǵy bar qazaqqa jetetuǵyn,
Máńgilikke toqtady ulyq demiń...
 

Asqar taýym qulady kúńirenip,
Sáýirdiń tastap ketti túni meni...
Ornyń bólek, kókejan, jatsa-daǵy,
Jaqsynyń biri ketip, biri kelip...

Jurtyńa bar syryńdy aqtardyń da,
Kóz tiktiń kóz jetpeıtin jappar muńǵa...
Bir mınót júregińnen shyǵarmaǵan,
Aqtilekke asyǵyp attandyń ba?!.

Kókirekti sharpyǵan jalyn mynaý,
Jalǵanǵa jan daýysymmen shaǵyndym-aý...
Baqıǵa tym erterek sapar shekken,
Ulyńdy, kóke, sumdyq saǵyndyń-aý?!.

Jany men júregi aq beksiń deımin,
İzgiligiń ilgerige jetsin deımin.
Jetpegen armanyńa aq kókeshim,
Nemereń men shóbereń jetsin deımin.

Jalǵandy keship jatyr esinep el,
Imandy júregi men esine ber!
Kókemniń pendeshilik qatelerin,
E, Alla, raqymyńmen keshire gór!..

Qajymuqan ǴABDOLLA