Malaızıa bıligi 8 naýryzǵa qaraǵan túni joǵalyp ketken «Boıng 777» bortynda shyn mánisinde ne bolǵanyn anyqtaǵansha, olar osy ushaqta bolǵandardyń árqaısysyna qatysty málimetterdi jiti zerttemek, dep habarlaıdy CNN.

Ushaqtyń bortynda bolǵan 239 adamnyń bári de tutqyn bolýy múmkin nemese árqaısysy kúdikke alynýy da ǵajap emes. Barlyq jolaýshylar da, eki ushqysh ta kúdiktilerdiń qatarynda. Sol bortta bolǵandardyń árqaısysynyń ómiri jiti zerttelmek. «Osy ushaqta bolǵandardyń árqaısysynyń ómirbaıanyn zertteý kerek», - dedi Nú-Iorktegi FTB dırektorynyń burynǵy kómekshisi Bıll Gevın. - Árıne balalar men qarttar kúdiktiler qataryna qosylmaıdy». Esterińizge sala keteıik, Malaysian Airlines áýe kompanıasynyń Kýala-Lýmpýrdan Beıjińge bet alǵan MN370 laınerimen baılanys 8 naýryzǵa qaraǵan túni úzilgen edi. Ekıpaj odan keıin baılanysqa shyqpaǵan jáne apatqa ushyraǵany jóninde dabyl bermegen. Apat oryn alatyndaı aýa raıy da qolaısyz bolmaǵan. Ushaqtaǵylarmen baılanys sońǵy ret Malaızıanyń shyǵys jaǵalaýynan 220 shaqyrym jerde ornatylǵan. Ushaq bortynda 227 jolaýshy men 12 ekmpaj múshesi bolǵan. Túrli elderden ushaqtar Ońtústik Qytaı teńizinde izdeý sharalaryn júrgizýde. Joǵalyp ketken «Boıng 777»-ni izdeýge kirisken elder sany 25-ke jetti, dep habarlaıdy Malaızıanyń kólik mınıstri Hısamýddın Hýseın. Apatqa sebep bolǵan negizgi sebepter mynalar bolýy múmkin: tehnıkalyq aqaýlyq, qozǵaltqyshtyń isten shyǵýy, lańkesterdiń shabýyly, ushaqty urlaý, ekıpajdyń qateligi.

QazAqparat