Jerden bólek, jer qoınaýyndaǵy qazyna da aýksıon arqyly satyla bastady. Elimizdegi paıdaly qazbaǵa tunyp turǵan 100-den asa ken orny 16-shy maýsymda ashyq saýdaǵa shyǵarylmaq, - dep habarlaıdy Qamshy.kz KTK arnasyna silteme jasap.

Qazaqstannyń kez-kelgen qaltaly azamaty men sheteldikter aýksıonǵa qatysyp, baǵaly, túrli-tústi metal, altyn, mys, tipti almazy bar ken ornyn satyp alýǵa qaqy bar. Eń qymbat baǵa usynǵan baılar qoınaýy qazynaǵa toly jerdiń ıesi atanady.

Birinshi kezeń boıynsha, Aqmola oblysyndaǵy «Komsomol» ken orny saýdaǵa túsedi. Onyń  bastapqy quny 9 jarym mıllıon. Al, Soltústik Qazaqstandaǵy almazy bar «Qaratal» ken ornynyń bastapqy baǵasy  600 myń teńge. Aýksıonǵa qatysýǵa nıetti ınvestorlar men jergilikti kásipkerler 26-shy mamyrǵa deıin ótinish jazýy tıis. Jer qoınaýyndaǵy baılyqty jappaı satý naýqany byltyr bastalǵan bolatyn. Ol kezde saýdaǵa qoıylǵan 100 ken ornynyń 49-y satylyp, búdjetke 1 jarym mıllıard teńge túsken.