Tarazda tapa tal túste oq atyldy. Kásipkerdiń úıinen shyǵýyn ańdyp turǵan eki azamat egde jastaǵy áıel adamdy esik aldynda qylqyndyryp, qolyndaǵy sómkesin ala qashady. Sumdyq jaǵdaıdy jolaı ótip bara jatqan kóliktegi jolaýshy baıqap qalyp, qýa jónelgen. Alaıda urynyń bireýi tapanshadan oq jaýdyryp, kýágerden qutylmaq bolǵan, - dep habarlaıdy Qamshy.kz 31-arnaǵa silteme jasap.
Bul shytyrman kınodaǵy atys- shabys emes. Kúni keshe Taraz qalasy Asanbaı Asqarov kóshesinde tapa tal túste bolǵan jaıt. Jaqyn mańdaǵy dúkenniń beınekamerasyna túsken bul kóriniste urynyń biri ózderin qýa jónelgen jigitke birneshe márte oq jaýdyrǵany anyq ańǵarylady. Tapanshadan atylǵan oq 22 jastaǵy azamattyń sanyna tıip, aldyńǵy bulshyq etin julyp biraq shyqqan. Jaralanǵan jigit et qyzýmen alǵash jaraqatyn baıqamaǵanyn aıtady.
JANDOS TOQTASYN, Turǵyn:
- Shamamen 3-4 ret atyldy. Biraq sanaǵan joqpyn. Ondaı kezde eshkim sanamaıdy dep oılaımyn. Sóıtip qýalaı bastadyq. Somen tapansha atylyp jatqan soń sál - pál basty buǵyp, qashyp qýalap edim. Sol sátte patrúldik mashına qýdy. Keıin qarasam aıaǵymnan qan ketip jatyr eken.
Belgili bolǵandaı kólikpen ótip bara jatqan Jandos eki azamattyń kelinshekti uryp, qol sómkesin tartyp alǵanyn kóredi. Birden basyn báıgige tigip, buzaqylardy qýa jóneledi. Abyroı bolǵanda tártip saqshylary jedel jetip, aman qalypty.
ÓMİRJAN NURALIEV, JPP batalónynyń polıseıi:
- Qyzmet barysynda úsh azamattyń qarama-qarsy betpen júgirip kele jatqanyn baıqadyq. Eń artynda betperde, qolynda tapanshasy boldy. Asqarov kóshesinen Mıchýrın kóshesine buryla tapanshasy bar azamat eki ret qoldanyp, ortadaǵy júgirgen azamattyń aıaǵynan jaralady. Ol otyryp qalǵanda biz kópke sozbaı kúdiktini quryqtadyq.
Osylaısha on mınýttyń ishinde kúdiktiniń biri qolǵa túsedi. Ekinshisi jaqyn mańdaǵy aryq ishinde jasyrynyp jatqan jerinde ustaldy. Olar osy úıde turatyn kásipkerdi bir aı boıy ańdyp júripti. Beıtanys jigitterdiń bul mańdy aınalshyqtap júrgenin kórshileri de, kásipkerdiń ózi de baıqapty.
SARA BAINAZAROVA, Zardap shegýshi:
- Dál myna jerde otyrdy. Ne istep otyrǵan balalarsyńdar dedim. Men ondaı kútken joqpyn. Jaǵamnan ala ketip, moınymnan qylqyndyrady dep. Men olardan jaqsy sóz kúttim. Uryp-soǵyp, pıstolet taqaǵanda men mynda quladym.
Qazir zardap shekken Sara tártip saqshylaryna alǵystan basqa aıtary joq. Ózi úshin oqqa ushqan azamatty beıbit kúnniń batyryna balaıdy. Aıta keteıik qoldy bolǵan sómkede eki jarym mıllıon teńge bolypty. Al ony tartyp alǵandar Taraz qalasynyń 1994 jylǵy týmalary ekeni anyqtaldy. Qazir olar ýaqytsha qamaý abaqtysynda.
