Elge tanymal ánshi Sáken Maıǵazıev áıelder túzetý mekemesine baryp, temir tordyń ar jaǵynda kúneltip júrgen analar men qyzdarǵa arnap konsert qoıdy, - dep habarlaıdy Qamshy.kz Stan.kz – ke silteme jasap.

Óz tyńdarmandaryn qalyptastyryp, qazaq sahnasynda eshkimge uqsamaıtyn daýsymen erekshelenetin ánshi Sáken Maıǵazıev áıelder kolonıasyna bardy. Ol atalǵan mekemede konsert qoıyp, úlken kisilerdiń aq batasyn aldy.

«Jylaǵan júrekterdi jubatyp, aq batalaryn alyp qaıttyq. Bostandyqtyń baǵasyn bilmeı júrmiz-aý degen oı taǵy keldi. 2013 jyly da áıelder merekesi qarsańynda shákirtterimmen baryp, kóńilderin kóterip qaıtqan edim, bul jolǵy kezdesýimizge Kenjebek tuzdyq boldy. Ár ánniń mátinine mán berip, saǵynyshtan sarǵaıyp kózine jas alǵan analar men bolashaq analardy kórgende erkek basyńmen eriksiz… Alla taǵala mundaǵy názik jandylardyń erterek otbasyna oralýlaryn násip etkeı», – dep ánshi konsert barysynda bir jylap alǵanyn aıtty.

Muny bilgen tyńdarmandary Maıǵazıevke alǵys jaýdyrdy. «Jaraısyń, Sáke. Bir sát bolsyn áıelderge qýanysh syılap, olardy baqytty etkeniń úshin rahmet» syndy pikirler bildirip, ánshiniń bul áreketin qoldaı túsken.

Ánshi osy ýaqytqa deıin ánin súıip tyńdaıtyn tyńdarmandarynyń úıinde qonaq bolyp, olardy erekshe kóńil-kúı syılaǵan-dy.