Qatty jaýǵan jańbyr saldarynan arnasynan asqan Esentaı ózeni jaǵalaýdy shaıyp, ondaǵy jer úılerdiń biriniń monshasyn kúl-talqan etken, - dep habarlaıdy Qamshy.kz informburo.kz – ke silteme jasap.

Oqıǵa 1 mamyr kúni tús kezinde bolǵan. Astyn sý shaıǵan monshanyń ózen arnasyna qulaǵan sáti túsirilgen vıdeo áleýmettik jelilerde jarıalanýda.

«Qatty jaýǵan jaýyn saldarynan Medeý aýdanynda Esentaı ózeniniń shyǵys jaq jaǵalaýy shaıylyp ketti. Saldarynan jeke turǵyn úı sektoryna qarasty sharýashylyq ǵımaraty qulady. Oqıǵa ornyna tótenshe jaǵdaılar basqarmasynyń mamandary bardy. Zardap shekkender joq», - deıdi Almaty qalalyq TJD baspasóz hatshysy Sandýǵash Baımuhanova.

Esterińizge salsaq, 29 sáýir kúni túnde Almatynyń Alataý jáne Jetisý aýdandarynda qatty jaýǵan nóser saldarynan birneshe úı sý astynda qalǵan bolatyn. 30 sáýir kúni Almatydaǵy Alǵabas eldi mekeninde de birneshe úıdi sý basty. Qarǵaly ózeniniń arnasynan asýy nátıjesinde sý deńgeıi 30 sm-ge kóterilip, 59 jeke turǵyn úıdiń aýlasyna sý kirgen bolatyn.

Sonymen qatar, qutqarýshylar aldaǵy kúnderi osyndaı jaǵdaıdyń taǵy da qaıtalanatynyn joqqa shyǵarmaıdy. Qala basshylyǵy Alǵabas eldi mekenindegi zardap shekken turǵyndarǵa 100 AEK (212000) teńge kóleminde qarajat tóleıtinin habarlaǵan.