Almatyda joǵalǵan stýdenttiń máıiti Esentaı ózeninen tabyldy, - - dep habarlaıdy Qamshy.kz Almaty qalasy İİD baspasóz qyzmetine silteme jasap.

S. Aspandıarov atyndaǵy Qazaq ulttyq medısınalyq ýnıversıtetiniń stýdenti Sanjarbek Arzıevti izdestirý jónindegi jedel tergeý toby stýdenttiń máıitin Esentaı ózeninen tapqan.

«Toptyń habarlaýynsha múrde ózenniń Rysqulov dańǵyly tusynan tabylǵan. İzdestirý sharalary barysynda Sý resýrstaryn basqarý jónindegi basqarmaǵa Esentaı ózeniniń sýyn basqa kózderge baǵyttaý arqyly tómendetý týraly ótinish jasalǵan bolatyn. Basqarma  ótinishti qanaǵattandyryp, nátıjesinde jas jigittiń múrdesi sý túbinen tabylyp otyr», - delingen İİD taratqan habarlamada.

Qazir sot-medısınalyq saraptama taǵaıyndaldy. Tergeý barysynda oqıǵaǵa qatysty basqa da jaǵdaılar naqtylanatyn bolady.

Esterińizge salsaq, S. Aspandıarov atyndaǵy Qazaq UMÝ stýdenti Sanjarbek Arzıev sáýirdiń 29-ynan 30-yna qaraǵan túni týǵan kúnnen taksımen qaıtyp kele jatyp, taksıden túsken bette joǵalyp ketken bolatyn. Kóshedegi beınebaqylaý kameralarynyń birine onyń Esentaı ózenine qulap ketken sáti jazylyp qalǵan. Alaıda, sýǵa túsken súńgýirler joǵalǵan stýdenttiń máıitin tappaǵan edi.