Qazaqstandyqtarǵa Jer kodeksiniń durys túsindirilmeýine depýtattar kináli dep esepteıdi Májilis depýtaty Nurtaı Sábılánov. Onyń pikirinshe, halyq jer týraly zańdy durys túsinbegendikten elde jer saýdasyna qatysty daýly máseleler jıi týyndap otyrǵan kórinedi, - dep habarlaıdy Qamshy.kz informburo.kz portalyna silteme jasap.
"Biz moıyndaımyz, bul birinshiden úkimettiń qateligi, bizdiń depýtattardyń qateligi. Biz halyqqa tıisti deńgeıde túsindirý jumystaryn júrgizgenimiz joq, ony moıyndaımyz. Ásirese, Jer kodeksine engizilgen túzetýler men ózgertýlerge qatysty. Túsindirý jumystaryn jyl basynda, tipti, byltyr búkil oblystarda, aýdan-qalalarda júrgizýimiz kerek edi" dedi Májilis depýtaty Semeı qalasyndaǵy saılaýshylarymen kezdesý barysynda.
Sábılánov Semeıge osy Jer kodeksine baılanysty arnaıy kelip otyr. Qazastandyqtardy aıaǵynan tik turǵyzǵan osynaý zańnyń qyr-syryn depýtat óz jerlesterine túsindirip kórmekshi. Onyń aıtýynsha, jerdi jalǵa berýdiń ýaqytyn sozýǵa qatysty ózgeris zańǵa 2014 jyly enip ketken. Biraq, kópshilik muny byltyrǵy jańalyq dep eseptep otyr deıdi halyq qalaýlysy. Buǵan deıin bılik ókideri jappaı qaıtalaǵandaı, Sábılánov ta Qazaqstan jeriniń sheteldikterge eshqashan satylmaıtynyn, tek jalǵa beriletinin eskertti. Satyp alý úshin Qazaqstan azamaty nemese Qazaqstanda tirkelgen zańdy tulǵa bolýy tıis.
"Qazaqstanda 100 mıllıonnan astam aýylsharýashylyq jerleri bar. Onyń 99,5 mıllıonyn qazaqstandyqtar jalǵa alyp otyr. Al, osy 99,5 mıllıon gektardyń 65 myń gektary sheteldikterde. Bul nebári 0,06 paıyz. Degenmen, sol 65 myńnyń 45 myńy birlesken kompanıalardyń enshisinde. Áý basta halyqqa dál osylaı túsindirýimiz kerek edi" deıdi depýtat.
Onyń aıtýynsha, SHQO-da iri ınvestorlar joq. Sheteldik kompanıalarǵa jalǵa 300 gektar jer berilgen.
"Al, qalǵan jer telimderi óz azamattarymyzda. Biz olarǵa bul jerlerdi jeńildikpen satyp alýǵa usynys jasap otyrmyz. Olar jumys isteýi kerek, jer ıgerilýi kerek" dep atap ótti Májilis depýtaty. Ol sondaı-aq, Jer kodeksine qatysty halyq tarapynan usynys bolsa Parlament qabyrǵasynda mindetti túrde qaralatynyn da eskertti.
