Otbasyn asyraýǵa shamasy kelmegen erkekter psıholog jaǵalap júr. Elimizde turmys taýqymetine tóze almaı, júıkesi syr bergen azamattardyń sany artypty, - dep habarlaıdy KTK arnasy . 

Jigeri qum bolǵan soqtaldaı jigitter psıholog mamandardyń kómegine júginýge májbúr. Dárigerler úshin bul tabys kózi bolǵanymen, olar júıkesi juqarǵan erkekterge erekshe alańdaýshylyq tanytyp otyr.

Turmys taýqymeti almatylyq er azamattarǵa qatty áser etken syńaıly. Sońǵy 1 jyl ishinde psıhologtyń esigin qaqqan otaǵasylar sanynyń kúrt ósýi osyǵan dálel. Tabystyń azaıýy, otbasyndaǵy qıyndyqpen basy qatqan olar osylaı mamannan keńes suraýǵa májbúr. Qazir bir dárigerdiń ózi aıdyń ishinde 10-nan astam jigitpen jumys isteıdi.

"Psıhologıalyq kómek suraıtyn er azamattar sońǵy kezderi jıilep kelip jatyr. Sebebi, ekonomıkalyq jaǵdaıǵa baılanysty, otbasyndaǵy materıaldyq jaǵdaıǵa baılanysty. Halqymyzǵa belgili er azamattar da bar. Olar da keledi", - deıdi  psıholog Kúlmash Elshibaeva.

Munda kelýshilerdiń jas shamasy negizinen 30 ben 50 jas aralyǵynda. Kóbi otbasyn asyraý qıyndaǵanyn aıtyp shaǵymdanady eken. Jigitterdiń bulaı jasýy psıhologtardy alańdatyp otyr.

"Qarajattyń jetispeýshiligi, jumystyń bolmaı qalǵan kezderi boldy.  Eshkim májbúrlemedi. Men óz erkimmen keldim. Endi shyny kerek ashýlandym, qatty. Ne isterimdi bilmedim", - deıdi kelýshilerdiń biri.

Almatylyq psıhologtarda osylaı kúnde qarbalas. Bir qyzyǵy, otbasyn asyraı almaǵan erlerdiń psıhologqa aqshany qaıdan tabatyny túsiniksiz. Sebebi, mamandardyń bir saǵattyq áńgimesiniń quny orta eseppen 7 myń teńge. Al, eń biliktileriniki 25 myńǵa deıin jetedi.

Al erlerdiń basyna túsken kúızelisti jeńý úshin psıhologtyń aldyna kemi 3 ret barý qajet. Birinshi qabyldaýdan qalpyna keletinder sırek. Tipti, mundaı jaǵdaıda astrologtar men kóripkelderdi jaǵalap ketetinder de kóptep kezdesedi eken. Al kúızelistiń aldyn alý úshin tekke kúıgelektenbeýdiń ári áıeldiń erine demeý bolýynyń mańyzy zor deıdi mamandar.