Almaty oblysynyń İle aýdanynan jer satyp alǵan 100-ge jýyq azamat qujattary zańǵa saı rásimdelgen bolsa da, jer telimderinen aıyrylyp qalamyz ba dep alańdap otyr, - dep habarlaıdy Qamshy.kz.  31 arnaǵa silteme jasap.

Sebebi jerdiń alǵashqy ıesi telimderdi turǵyndarǵa bólip satqan azamatty sotqa berip, arada jasalǵan kelisimsharttyń kúshin joıýdy talap etýde. "Maıl-stoýn" kompanıasy ıeligindegi 38 jáne 25 gektar jerlerdi alyp, úshinshi tarapqa, ıaǵnı turǵyndarǵa satqan Almas Bazarbekov esimdi azamat kompanıaǵa 700 mıllıon teńge bereshek dep sotqa júgingen. Baspana turǵyzamyz dep jer alǵan halyq ózara sottasqan eki tarapqa kezek jaltaqtap, sotqa sabylyp júr. 

Jer telimderin satyp alǵandardyń keıbiri ózderin sotqa ne úshin shaqyrtqanyn túsinbeı álek. Aqshasyn tólegen, shart jasasqan, ádilet basqarmasy jerdiń kepilde turmaǵany jóninde anyqtama bergen, memlekettik akt qoldarynda. Biraq alǵashqy sot otyrysyna sýdıa 49 telimniń ıesin shaqyrtsa, kelesi otyrysta olardyń sany artty. Aıtýlarynsha, 300-deı adam Bazarbekovten jer satyp alǵan.

«Eki aradaǵy kelisim-sharttyń buzylǵany bizge áser etpekshi. Óıtkeni biz Bazarbekovpen eseptesip, dokýmentterdi qolymyzǵa alyp bárimiz, aramyzdaǵy keıbireýler ol jerge úılerin salyp, keıbireýler salmaqshy bolyp aqsha salyp qoıdy onda» , deıdi jer teliminiń ıesi Aıdar Súgirbekov. 

 Materıaldy jaqynda ǵana alǵanyn alǵa tartqan «Milestone» kompanıasynyń zańgeri qazir eshqandaı suraqtara jaýap bere almaıtyny aıtty.

Taraptardy tyńdap alǵan tóraǵa 11 mamyrda sheshim oqylatynyn eskertti. Telimderiniń bolashaǵyna alańdaǵan halyq baspana qurylysyn ýaqytsha toqtata turmaq.