Asqar Jákýlın atyndaǵy qor naýqas balalarǵa qýanysh syılady

/uploads/thumbnail/20170709010134849_small.png

«Asqar Jákýlın atyndaǵy qaıyrymdylyq qory». Bul ataýdy estigen kópshilik jurt Asqar Jákýlın degen kim deýi ábden múmkin. Sebebi onyń esimi Alty Alashqa asa tanymal dep aıta almaımyz. Eger onyń atasy Jákýla 1800 jyldary-aq eýropalyq deńgeıde medısınalyq bilim alsa, bolys atansa, táýelsizdigimizdiń irge tasy «Alashorda» úshin qyzmet etse, Al ákesi Ánýar Qytaıdaǵy İle aımaǵynyń ýálıi atanyp, Shyńjań ólkesiniń polısıa bastyǵy bolsa, QHR halyq quryltaıynyń birinshi shaqyrylym depýtaty bolsa, onda Asqar kim bolýy múmkin?

Asqar – sondaı tegeýrindi tekti atalarynyń amanatyn Atajurtta jalǵaǵan azamat edi... Kózi tirisinde kóp mal-múliktiń ıesi atandy. Bylaıǵy jurttyń birazy ony eń aldymen «qaltasy qalyń» baı retinde tanıtyn... Biraq Asekeń óziniń kim ekenin óler aldyndaǵy ósıet hatynda «altyn árippen» jazyp ketipti:«Men úshin ómirimdegi eń keremet oqıǵa – Qazaqstannyń táýelsizdik alýy, eń uly sheshimim – Qazaqstanǵa qonys aýdarýym...». Budan artyq qazaq balasy úshin qandaı sóz kerek? Qytaıda týyp, Germanıada oqyp, Pekınde qyzmet atqarǵan Asqarǵa mıllıard qytaı ishindede «altyn taǵy» saılaýly edi... Biraq Asqar úshin táýelsizdigin endi alyp, qalt-qult etip turǵan Qazaqstanǵa qyzmet etý qymbatyraq boldy. Otbasymen qonys aýdardy, bıznes bastady, qurylysqa qajetti tehnıka tasydy... Ózi de baıydy, ózgelerdi de toq qyldy. Aǵaıyn-týysqa qol ushyn sozdy. Atasy Jákýlanyń asyn Alty Alashqa dúrildetip ótkizdi.

Bir áttegen-aıy - Aıdana men Aıqut esimdi eki balasy jastaı qaldy artynda. Bir qýantatyny - Asekeńniń ómirden ótkenine 100 kún tolmaı jatyp, jary Jaına Jákýlına qurǵan qaıyrymdylyq qor qazaqqa qyzmet ete bastady...

Keshe ǵana Almatydaǵy «Aqsaı» ýnıversıtettik klınıkalyq balalar aýrýhanasynda «Asqar Jákýlın atyndaǵy qaıyrymdylyq qor» aıtýly shara ótkizdi. Qor quryltaıshylary quny 4 mıllıon teńgeden astam saýyqtyrý qondyrǵylaryn balalar aýrýhanasyna tabystap, sonda qyzmet atqaratyn dárigerler men dertine shıpa izdegen sábılerdiń sheksiz alǵysyna bólendi. Aqyn, Qazaqstan Respýblıkasynyń mádenıet qaıratkeri Almas Ahmetbek, qor quryltaıshysy Jaına Jákýlına, qor dırektory Gúlnar Seıdolla bastaǵan top zamanaýı emdeý qondyrǵylarynyń tusaýkeser rásimine qatysty. Aýrýhana dırektory Irına Brejneva hanym «Asqar Jákýlın atyndaǵy qaıyrymdylyq qoryna» sheksiz rızashylyǵyn bildirdi. Asqar Jákýlın myrzanyń áýletine rahmet aıtyp, kópshilikten marqumdy bir mınýt eske alýdy surady. Aýrýhana qyzmetkerleriniń aıtýynsha, Irına hanym kezinde ataǵy dúrkirep, keıin «qaraýsyz» qalǵan aýrýhanany qaıta túletken aq halatty abzal jan eken. Al sol aýrýhanada 40 jyl qyzmet atqarǵan Nesibeli Esimova apaı Asqar Jákýlın myrzanyń rýhy qatarymyzda turǵandaı sezindim dep kóńil tolqynysyn aqtardy. Tusaýkeser rásimin Dırektor orynbasary Aıdar Mamedov júrgizdi.

Aqyn Almas Ahmetbekuly aýrýhana ujymy men aýrýyna shıpa izdep kelgen jandarǵa Asqar Jákýlın týraly qysqasha málimet berdi. «Asqardaı azamattyń 17 aı boıy aýrý azabyn birge bólisken jary Jaına Jákýlınanyń» qaıyrymdylyq qoryn quryp, naýqas balalarǵa kómekteskenine tilektesigin jetkizdi. Al Qor dırektory Gúlnar Seıdolla hanym aldaǵy ýaqytta da zárý mekemelerge qol ushyn sozyp, aýrý jandarǵa shıpa syılaý – qaıyrymdylyq qordyń basty maqsaty dedi.

Eń áserli sát – jańa qondyrǵylardyń emine zárý bolyp otyrǵan balalardyń, olardyń ata-analarynyń, sol emdi qolmen jasap júrgen dárigerlerdiń sózderin estigende tolqymaǵan jan qalmady.

Aıta keterligi – «Asqar Jákýlın atyndaǵy qor» buǵan deıin de Shyǵys Qazaqstanda júlde qory 2,5 mıllıon teńgeny quraıtyn oqýshylar arasynda olımpıada ótkizipti.

Iá, atam qazaq aıtqandaı, «jaqsydan sharapat, jamannan kesepat», «jaqsynyń aty ólsede haty ólmeıdi»... Asekeńniń jary Jaına men baýyrlarynyń sózinen ańǵarǵanymyz – «Asqar Jákýlın atyndaǵy qordyń» atqaratyn qyzmeti alda. Ásirese, qazaq balasynyń aýrýyna em, dertine shıpa tabýyna aıanyp qalmaımyz dep otyr. Sondaı-aq, oqýshylar arasynda ótetin «Jákýla Kúshikulynyń» atyndaǵy olımıpıadanyń da jyl saıyn kemeldenip, keńeıe túsetinine nyq senimdi.

Asqar marqumnyń rýhy jánnatta shalqyǵaı!