Ulttyq ulannyń «Ońtústik» óńirlik qolbasshylyǵynda Otan qorǵaýshylar kúni merekesi men Uly Jeńistiń 71 jyldyǵyna oraı «Eshkim de, eshnárse de umytylmaıdy!» atty taqyryppen saltanatty merekelik is-shara bolyp ótti.
İs-sharany quttyqtaý sózderimen ashqan «Ońtústik» óńirlik qolbasshylyǵy qolbasshysynyń tárbıe jáne áleýmettik-quqyqtyq jumystary jónindegi orynbasary polkovnık Nurbaı Bektursynov Uly Otan soǵysynyń ardagerleri men Tyl maıdangerlerin jáne barsha jeke quramdy Jeńistiń 71 jyldyǵymen, sonymen qatar Otan qorǵaýshylar kúni merekesimen quttyqtap, olarǵa ıgi jaqsylyqtar tiledi. Ol óz sózinde: «Uly Jeńis meıramy – Qazaqstan halqynyń erligin, batyldyǵyn, abyroıyn asqaqtatýmen qatar, beıbit ómir men Otan úshin janyn qıǵan jaýyngerlerdi eske alatyn erekshe mańyzdy mereke. Osyndaı merekeniń jalǵasyp kele jatqanyna bıyl 71 jyl, jáne onyń toılanýynyń Táýelsizdigimizdiń 25 jyl tolýymen tuspa-tus kelip jatqany – biz úshin qosarlanǵan qýanysh» dep atap ótip, bundaı erlik dastanyn eshqashan umytý múmkin emestigin pash etti. Bunymen qosa ol, batyr babalar erliginiń jalǵasy ispettes Ulttyq ulannyń qazirgi zamanǵy áskerı qyzmetshileriniń erligin de esten shyǵarmady, ásirese kúni keshe ǵana Elbasynyń Qaýlysymen óz ómirin qaterge tigip, jas sarbazdy ólimnen arashalap qalǵan polkovnık Qaırat Úmbetovtiń Qazaqstandaǵy eń úlken nagrada «Halyq qaharmany» ataǵyna qol jetkizýin naǵyz erliktiń úlgisi ekendigin zor qýanyshpen jetkizdi.
Udaıy jas sarbazdarǵa patrıottyq tálim-tárbıe berip kele jatqan «Ońtústik» óńirlik qolbasshylyǵy Ardagerler keńesiniń tóraǵasy Gennadıı Faleev pen İshki áskerler ardageri Vasılıı Mezın de barsha áskerı qyzmetshilerdi tól merekelerimen quttyqtap, Uly Otan soǵysynyń ardagerleri men Tyl maıdangerlerine júrekjardy sózderin arnady.
Quttyqtaý sózderden keıin Otan qorǵaýshylar kúni men Uly Jeńistiń 71 jyldyǵy merekeleri qarsańynda qyzmettik mindetterin adal atqaryp, úzdik jetistikterge qol jetkizgen ofıserler men kelisimshart áskerı qyzmetshilerin kótermeleý týraly İshki ister mınıstriniń, Ulttyq ulan Bas qolbasshysynyń jáne «Ońtústik» óńirlik qolbasshylyǵy qolbasshysynyń buıryqtary oqylyp, úzdik áskerı qyzmetshilerge medaldar, gramotalar jáne baǵaly syılyqtardy İshki ister mınıstriniń jáne Ulttyq ulan Bas qolbasshysynyń atynan «Ońtústik» óńirlik qolbasshylyǵynyń qolbasshysy general-maıor Álibek Serálıev jeke ózi tabys etti.
Merekelik jıynǵa Uly Otan soǵysynyń ardagerleri, Tyl maıdangerleri jáne «Ońtústik» óńirlik qolbasshylyǵynyń jeke quramy qatysyp, aıtýly mereke kúni erekshe qurmetke bólendi. İs-shara sońynda Uly Otan soǵysynyń ardagerleri men Tyl maıdangerlerine arnalyp dastarhan jaıyldy.
