Búgin túnde órtke oranǵan Almatydaǵy «Iýbıleınyı» dúkeni men onyń ústindegi turǵyn úıge qala basshysy Baýyrjan Baıbektiń arnaıy baryp, ondaǵy jaǵdaımen tanysqanyn, zardap shekken turǵyndarmen kezdeskenin aqparat quraldary jarysa jazýda. Qala basshysynyń tilsiz jaýdan zardap shekken turǵyndardyń ahýalyna enip, qamqorlyq tanytýy quptarlyq jaı, árıne. Alaıda, órtke sebep bolǵan nysannyń eń aldymen jeke menshiktegi saýda úıi ekendigin eskersek, ol oıyńyzdan da dereý aınyp qalasyz.

Almaty jurtshylyǵyn tilsiz jaýmen qatar, sý tasqyny da az alańdatyp otyrǵan joq. Byltyrdan beri qar sýy da, jaýyn-shashyn da almatylyqtar úshin ońaıǵa soqpaı otyr. Sáýir aıynyń sońynda Almatydaǵy birneshe ózen tolassyz jaýǵan jańbyrdan arnasynan asyp, qalanyń tómen jaǵynda ornalasqan birneshe eldi mekendegi úılerdi sý basty. Búgin túnde jaýǵan jańbyr saldarynan da sol jaǵdaı qaıtalanyp otyr. Qarǵaly, Esentaı, Aqsaı, Úlken Almaty syndy ózenderge jaqyn ornalasqan aýdandardyń turǵyndary qorqynysh qursaýynda qalyp otyr.

Ár óńirden Almatyǵa aǵylǵan talaı qazaq otbasy panalap otyrǵan «Shańyraq» yqsham aýdanynda da jaǵdaı qıyndap otyr. Mundaǵy kósheler men jer úılerdiń aýlalaryna deıin sý astynda qalǵan. Bul týraly «Feısbýk» jelisinde Halelhan Ibraıymhanuly atty turǵyn dabyl qaqty.

«Joldyń barlyǵyn polısıa japqan. Saı-salany túgel sý basqan. Osy saıdyń barlyǵynda otyrǵandar – bizdiń qara kóz qazaqtar. Sondyqta, osyndaı saı-salany panalap otyrǵan qazaqtarǵa úı salý úshin jazyq jerlerden on sotyqtan jer berilsin», - deıdi ol.

«Shańyraq» turǵyndarynyń bul zaryna qala basshylyǵy qashan qulaq asatyny belgisiz. Ázirge, ákim bastaǵan sheneýnikter «Iýbıleınyıdyń» úıleri úshin ǵana alańdap júr.