Naýqas balalardy emdeýde aıtarlyqtaı kómek qolyn sozyp júrgen qordyń dırektory Arýjan Saın elimizde panteon salýǵa túbegeıli qarsy. Qoǵam belsendisi mınıstr Arystanbek Muhamedıulynyń «Panteon qurlysyna qarsylar «Júz jyldyq jalǵyzdyq» kitabyn oqyǵannan keıin túsinedi» degen sózine jaýap berdi, - dep jazady Stan.kz saıty Arýjan Saınnyń facebook paraqshasyndaǵy jazbasyna silteme jasaı otyryp.
«Panteon qurlysyna qarsy, «Júz jyldyq jalǵyzdyq» kitabyn oqyǵan adam retinde men qaıtys bolǵannan keıin mınıstr panteonǵa jerlemekshi bolyp jatqan adamdardyń tizimin bilgim keledi. Olardyń ózinen qaıtys bolǵannan keıin sol jerde «jatqylary» keledi ma?, joq pa? sony surap bilgim keledi. Múmkin olardyń arasynda bólinip otyrǵan 79 mıllıardty (aqyry osy adamdar úshin bólgen eken) tiri kezinde densaýlyǵy men ómirine paıdalanǵysy keletinder bar shyǵar»,-deıdi Arýjan Saın.
Qaǵam belsendisi sońǵy on jylda naýqas balalarǵa jınalǵan qarjy men sonyń arqasynda qansha búldirshinniń densaýlyǵy, ómiri jaqsarǵanyn naqty sandarmen aıtyp ótti.
«Mysaly, qazaqstandyqtar sońǵy on jylda naýqas balalar úshin 2 mıllıard teńge jınaǵan. Osy qarjynyń kómegimen 1 410 balanyń densaýlyǵy men ómirin jaqsardy. Osydan artyq baǵaly ne bar?»,-dep suraq tastaıdy qoǵam belsendisi.
Arýjan Saın azamattarǵa panteon qurlysyn talqylaýdyń ózi artyq ekenin aıtady. Odan da osy qarjyǵa aýrýhana, beıimdeý ortalyqtaryn salýǵa, dárigerlerdiń saýaty men tájirıbesin arttyrýǵa jumsalsa degen usynys aıtady.
«79 mıllıard degen qandaı úlken qarjy. Al, naýqas adamdarǵa beriletin kómek aqy 10 AEK kóleminde. Mınıstrlerdiń osyndaı usynystary eń kónbis adamdardyń bas kóterip, ashýyn oıatý úshin aıtylatyn sıaqty. Ómir súrýimiz úshin barlyq jaǵdaı jasalyp, endi ólimge daıyndalý ǵana qalǵan sıaqty myna bastamalar. Adam ómirden ótkennen keıin halqy úshin istegen tirlikterimen jurt esinde máńgi qalady. Urpaǵy maqtan etip aıtatyn jaqsylyǵy bolady. Men óziniń ataqty shyǵarmasyn jazǵan kezde Markes qazir aıtylyp otyrǵan essiz shyǵyndar jaıly aıtpaǵanyna senimdimin»,-dep qorytyndylaıdy óz sózin Arýjan Saın.
Mınıstr Arystanbek Muhamedıuly buǵan deıin Astana turǵyndarynyń aldynda esep berý kezinde «Panteon árbir memlekette bar, Sondaı-aq ol bizge qajet zat» degenin de esterińizge salamyz.
