Aqmola oblysy Bestóbe kentindegi jumysshylar men kúzetshiler arasyndaǵy qaqtyǵysta aty atalatyn «Mys orda» kúzet agenttigi basshylyǵy zań buzdy dep 2012 jyly 2500 jumysshy eldiń sol kezdegi Eńbek jáne áleýmettik qorǵaý mınıstri Serik Ábdenovke hat jazǵan, - dep habarlaıdy Qamshy.kz.
Kúzet agenttigi qyzmetkerleriniń atynan jazylǵan hatta fırma basshylyǵy negizinen etnıkalyq káristerden jınaqtalǵanyn, ujymda basqa ult ókilderin kemsitý áreketteriniń baryn aıta kelip, basqa da zań buzýshylyqtar sóz etiledi.
«Bizdiń kásiporyn «Qazaqmys» koprorasıasy» JSHS-ǵa (budan ári - korporasıa) kúzet qyzmetin usynady. Bizden basqa korporasıaǵa «Qorǵaý-qyzmeti» JSHS da qorǵaý qyzmetin usynyp keledi. Osy jerde atalǵan kúzet mekemelerindegi jaǵdaı men qyzmetkerlerge qatysty ustanym birdeı emestigin aıtý kerek. Atalǵan jaǵdaıda, «Mys orda» JSHS tek qana onyń jalǵyz jáne eshqashan aýyspaıtyn jetekshisi (beı resmı árıne) Ogaı Iýrıı Vasılevıch úshin qurylǵanyn atap ótý kerek. Atalǵan basshy óz yńǵaıyna qurylǵan kásiporyndy tek BAIÝ maqsatynda paıdalanyp otyr», - dep jazady hat avtorlary.
İsker, tabysty azamattardyń bolǵanyna, baıyǵanyna esh qarsy emespiz degen jumysshylar atalǵan mekemede «Qazaqmys» koprorasıasynyń múlkin tonaýdyń belgili-bir syzbasy jasalǵanyn aıtady.
«Biz baı, tabysty adamdarǵa esh qarsy emespiz, olar elimizde kóp bolsyn, alaıda, olar Iý. V. Ogaı basshylyqqa alǵan jáne tájirıbede turaqty qoldanatyn ádistermen baıymaýy kerek qoı.
Iý. V. Ogaı korporasıa múlki men qundy zattaryn urlaýdyń túrli sqemalaryn uıymdastyrdy. Óziniń zańsyz áreketterine tosqaýyl boldyrmaý úshin Iý. V. Ogaı óndiris alańdaryndaǵy bólinis basshylary retinde ózine jaqyn adamdardy taǵaıyndady.
Mysaly, «Mys orda» JSHS Balqash fılıalynyń dırektory – Kan Andreı Nıkolaevıch.
«Mys orda» JSHS Qaraǵandy alańy boıynsha kúzet bastyǵy – Hon Evgenıı Inokentevıch.
Beıresmı kýrator retinde Ogaı Sergeı Lvovıchtiń aty atalady.
Qaýipsizdik qyzmetiniń bastyǵy – Ogaı Andreı Lvovıch.
Aǵa dıspecher – Ogaı (qyz kezindegi famılásy) Janna Lvovna.
«Mys orda» JSHS kúzet fırmasy tórt jyldan beri jumys istep keledi. Osy ýaqyt ishinde kóptegen bilikti qyzmetkerler sebepsiz jáne tıisti tólemdersiz jumystan shyǵaryldy. Tek sońǵy tórt aıda 500-den astam adam jumystan shyǵaryldy», - delingen hatta.
Kúzet agenttiginiń qyzmetkerleri sondaı-aq, fırmada qyzmettik kıimniń sapasyzdyǵy, onyń aqshasy jalaqydan ustalatyny, eshqandaı syıaqy berilmeıtini, eńbek zańnamalarynyń saqtalmaıtyny, tipti, jumysqa turý týraly ótinish berilgende óz erkimen jumystan bosatý týraly la ótinish qosa alynatynyn jazady.
Hat avtorlary kompanıadaǵy basshylyq qyzmet atqaratyn birneshe adamnyń jeke tulǵalyq qasıetterine, teris qylyqtaryna toqtalyp, keıbiriniń qylmystyq jaýapkershilikke tartylǵany, sol kezde ótelmegen qylmystyq jazalary baryn da aıtqan.
Eń qyzyǵy Serik Ábdenovten kómek suraǵan hat avtorlary atalǵan fırmanyń Prezıdenttiń Qaraǵandy qalasyndaǵy eki birdeı rezıdensıasyn kúzetetinin aıtady.
Birqatar zań buzýshylyqtardy ataǵan hatqa mınıstrlik jaýap qatqan. Ol jaýapta mundaı aryz-shaǵymdar anonımdi túrde kelgen bolsa qaralmaıtyny aıtylyp, hat avtorlaryna Qaraǵandy oblysy boıynsha áleýmettik qorǵaý jáne baqylaý departamentine jazbasha túrde ótinish jazýǵa keńes berilgen.
Jumysshylardyń jan aıqaıy jeter qulaqqa jetip, ujymdaǵy kúrdeli jaǵdaı sheshim tapty ma, tappady ma ol jaǵy belgisiz. Keshegi oqıǵa kúzet fırmasyndaǵy tártiptiń tıisti deńgeıge keltirilmegenin kórsetedi. Ashyq derek kózderinen atalǵan kompanıanyń qyzmetine qatysty málimet tabý qıyn. Bir baıqaǵanymyz - ǵalamtorda «Mys ordaǵa» jumysqa shaqyrǵan qulaqtandyrýdyń kóptigi.
Esterińizge salsaq, Aqmola oblysy Bestóbe kentinde 16 maýsym kúni atalǵan kúzet fırmasynyń qyzmetkerleri men «Qazaqaltyn» AQ-y jumysshylary arasynda qaqtyǵys bolyp, oq atylǵany, on adamnyń jaraqat alǵany týraly jazǵan bolatynbyz. Osy qaqtyǵys túsirilgen vıdeo senbi kúni áleýmettik jelilerde jappaı tarady. Oblystyq İİD, prokýratýra, eńbek ınspeksıasy atalǵan oqıǵa boıynsha «Buzaqylyq» babymen is qozǵalǵany, máseleniń mán-jaıy tekserilip jatqanyn habarlady.
