Jýrnalıs Ardabek Soldatbaı dintanýshylar Zikirıa Jandarbek pen Qaırat Joldybaıulyn «bılikke jetý úshin Elbasyǵa qarsy kóterilip, elde jappaı jazalaý saıasatyn júrgizýdi qoldaıdy» dep aıyptap otyr, - dep habarlaıdy Qamshy.kz. 

«Zikirıa Jandarbek sáláfıtterdi nege jek kóredi? Sebebi, sáláfıtter búlikke, mıtıńke, fıtnaǵa qarsy. Al, sopylyq-zikirshilik joldy ustanǵandar qalaı da bir bılikke jetýdi kózdeıdi. Ol úshin dindi óz yńǵaılaryna qaraı buryp, dástúrli qazaqy din nemese arabtyń dini dep bólip alady. Bılikke jetý úshin Elbasyǵa qarsy kóterilip, elde jappaı jazalaý saıasatyn júrgizýdi qoldaıdy. Ózderimen pikiri saı emesterdi túgeldeı atyp-asyp, túrmege jabýǵa daıyn», - degen A. Soldatbaı elde «sopylar» dep atalatyn dinı aǵymnyń da qoldaýshylary az emestigin aıtady.

«Bul sektanttardy ár kez túrli qyzmet atqaryp kórgen, biraq árdaıym sátsizdikke ushyraǵan, jekelegen basshylardyń kesirinen jumystan qýylǵan, karerasy óspeı ishine qan qatyp qalǵan, al bylaı dinge esh qatysy joq, araǵyn iship, zınasyn jasap júrgen «belsendiler» óz saıttary, BAQ-tary arqyly qoldaıdy. Úrıt soq deıdi. Olar ózderine naqty jábir kórsetkenderdiń qolynda áli bıligi bolǵan soń olarǵa úndeı almaı, taýhıdti tastaı qylyp ustanǵan musylmandarǵa tıisedi. Áıteýir bir jaý taýyp, ishtegi qyjyldaryn shyǵaryp almaqshy. Ózderi oınas jasap aırandaı uıyp otyrǵan otbasynyń shyrqyn buzyp, ózgeniń áıeliniń hám basqanyń baıynyń qoınynda jatyp kóp áıel alatyn musylmandarǵa tıisedi. Eshqaısysyn eshqashan jumystan qýǵan, qysym kórsetken sáláf joq. Biraq jaýlary sáláf. Sebebi, qashan da shaıtannyń jaýy taýhıd ustanýshylar», - deıdi A. Soldatbaı.

A. Soldatbaıdyń synynan Qazaqstanǵa tanymal dintanýshy-ǵalym, islam.kz saıtynyń Bas redaktory Qaırat Joldybaı da shet qalmaǵan. Ony jýrnalıs «patshaǵa qarsy kóterilgenderdi shahıdke teńedi» dep otyr.

«Zikirıa Jandarbek sekildi halyqty azdyryp, adastyryp, jiktep, bólip, bir-birine aılap salatyn zikirshi-sopylar - qazaqtyń basty jaýy. Bulardyń taǵy biri Qaırat Joldybaıuly kezinde patshaǵa qarsy kóteriliske shyǵyp ólgen adamdardy shahıdke teńep edi, endi namaz oqymasań oqymaı-aq qoı, odan kápir bolyp ketpeısiń dep onsyz da ımany álsiz jurtty aldap, azdyryp júr. Mundaılardy adamnyń ishinen shyqqan shaıtandar deıdi. Ol shaıtanyń tipti ǵulama atanyp júrýi múmkin. Sondyqtan, kimge erip, kimdi tyńdap júrgenderińizdi bilip alyńyzdarshy aldymen», - deıdi A. Soldatbaı.

Bul jýrnalıs Ardabek Soldatbaıdyń alǵash ret shýly málimdeme jasaýy emes. Buǵan deıin de ol salafızm ıdeıasyn aqtap, saıasattanýshy Aıdos Sarymmen sóz talastyrǵan bolatyn. Al, jaqynda A. Soldatbaı elimizdegi din isteri jónindegi komıtetti taratý kerek degen usynys tastady.