Búgin 2017 jyly ótetin Ýnıversıadaǵa daıyndyq jáne ótkizý dıreksıasynyń  basshysy Naıl Nýrov BAQ ókilderimen kezdesý barysynda Almaty qalasy 64 eldiń sportshylary men delegattaryn erkin qabyldaı alatynyn, alaıda, is júzinde 50 eldiń sportshysy Almatyǵa kelýi múmkin ekenin jasyrmady, - dep habarlaıdy Qamshy.kz

«Biz Almatyny Ýnıversıada kezinde 64 eldi qabyldaı alady dep aıta alamyz. Bul maksımaldy kórsetkish. Búgingi bizdiń Atletter qalashyǵy, sporttyq nysandar, transport,  logıstıkalyq múmkindikterimiz 64 eldiń 5000-ǵa jýyq sportshysyn qabyldaýǵa múmkindigi jetedi», - dedi Naıl Nýrov.

Kezdesý barysynda Naıl Nýrov osyǵan deıingi rekordtyq kórsetkish Erzýrým qalasynda tirkelgenin aıtyp ótti. Erzýrýmde 52 el Ýnıversıadaǵa qatysqan bolatyn.

«Oıyndar Eýropada ótken kezde logıstıkany jeńildetetini anyq. Eýropada Ýnıversıadaǵa qatyspaıtyn el joq. Biz Erzýrýmniń rekordyn buzýǵa talpyndyq. Biraq búgingi kúni álemde ekonomıkalyq qıyn jaǵdaılardyń oryn alýy armanymyzdyyń oryndalýyna kedergi boldy. Bizge 64 elden emes, 50 eldiń sportshylary kelýi múmkin dep jobalap otyrmyz. Biraq tirkelý jumystary áli aıaqtalmady. Jyl sońyna deıin bizde áli ýaqyt bar», - dep habarlady 2017 jylǵy qysqy Ýnıversıada dıreksıasynyń basshysy.

Sonymen qatar Naıl Nýrov, Ulttyq stýdentter sporty federasıalarynyń Ýnıversıadaǵa qatysýyn qamtamasyz etý Halyqaralyq stýdentter sporty odaǵynyń (FISU)qaraýynda ekenin de aıtyp ótti.  «Biz osy suraq boıynsha FISU kómegine jáne Qazaqstan ulttyq sporttyq stýdentter odaǵynyń kómegine júginemiz», - dep sózin aıaqtady Naıl Nýrov.

Belgili bolǵandaı, FISU reglamenti boıynsha qatysýǵa múmkindik beretin akredıtasıaǵa ótinish jiberý 2016 jyldyń 29-qańtarynan 2017 jyldyń 29-qańtaryna deıin jalǵasady.

Aıta keteıik, Ýnıversıadaǵa akkreıtasıalanýdyń birinshi kezeńinde 64 el qatysýǵa ótinish bildirgen bolatyn. Ekinshi kezeńde qatysýshy el komanda tizimi men sport túrleri jáne sportshylar men resmı adamdardyń naqty sanyn naqtylaýy tıis.