Halyqaralyq aýyr atletıka federasıasy London olımpıadasynyń synamalaryn qaıta tekserip, nátıjesinde 4 qazaqstandyq chempıonnyń: Ilá Ilın, Zúlfıa Chınshanlo, Maııa Maneza jáne Svetlana Podobedovanyń qanynan ruqsat etilmegen preparattardyń tabylǵanyn jarıalady. Olar dopıng qoldandy degen aıyppen tergeý aıaqtalǵansha jarystardan shettetilgen edi. Odan keıin I. Ilınniń Beıjiń olımpıadasy kezinde tapsyrǵan synamalarynan da tyıym salynǵan zattar quramy anyqtalǵany belgili boldy.
Osy habardan soń sport jankúıerleri men bylaıǵy jeli qoldanýshylary arasynda qyzý pikir-talas bastalyp ketti. Bir top sportshylarǵa arasha túsip, olardy belgili-bir kúshter qasaqana arandatyp otyr degen boljamdaryn aıtsa, ekinshi top sportshylardyń shynymen de dopıng qoldanýy múmkin degen oılaryn dáleldeýge tyrysýda. Aýyratletterdi alaıaq dep aıyptap, olardyń halyqtan keshirim suraýyn talap etip jatqandar da bar.
Abai.kz saıtyna bildirgen pikirinde elge tanymal sport jýrnalısi Eseı Jeńisuly Halyqaralyq uıymnyń sheshimin qabyl almasqa shara joqtyǵyn aıtypty.
- Halyqaralyq aýyr atletıka federasıasy (HAAF) Qazaqstan men taǵy birneshe eldi bir jylǵa barlyq jarystan shettetý týraly sheshim shyǵardy. Nazar aýdaratyn eki másele bar. Birinshisi, aıyp ýaqyty naqty kórsetilmegen. Ekinshisi, aıypqa jyǵylǵan eldiń bárinen Rıo olımpıadasynyń bir-eki joldamasy qaıtarylyp alyndy. Budan shyǵatyn qorytyndy qandaı? Aıyp ýaqyty Rıodan keıin qoldanylady. Qazir aıyptap jiberse, HAAF ónbes daýǵa qalaryn túsinip otyrǵan sıaqty. Óıtkeni, dál Rıo dodasy qarsańynda «ejelgi» synamalardy ashyp, aıdy aspanǵa qaıta shyǵarǵan «aıyby» bar. Sondyqtan Rıoǵa shektep qatystyrady, biraq dopıng aıybyna ilingen ziltemirshilerdi olımpıadaǵa jibermeıdi. Bul aýyr atletıkany taza sport jasaýdyń joly dep túsindirip jatyr. Durys ta shyǵar. Sonda bizdiń ziltemirshiler bıylǵy olımpıadadan keıin bir jyl jarystardan shet qalady. Asa kóp ýaqyt emes. Al olımpıadada 10 emes, 8 aýyr atletimiz (3 áıel, 5 er) synǵa túsedi. Meniń túsingenim osy. 2008-2012 jyldardaǵy dopıngti anyqtaý máselesinde úlken astar bar. Ony bizge jýyq arada túsindirmeýi de múmkin. Sondyqtan olardyń sheshimin qabyl alýǵa týra keledi, basqa amal joq.
Al, sport taqyrybynda qalam terbep júrgen jýrnalıs Rýslan Medelbektiń oıynsha dopın daýynan qandaı da bir saıası astar izdeýdiń qajeti joq kórinedi. Odan da el bolyp Rıoǵa barý múmkindigi 1 paıyzǵa teńelip otyrǵan I. Ilınnen basqa sportshylardyń komanda quramyna ótýin tileýimiz kerek.
- Iaǵnı dopıng tekserý barlyq zańǵa sáıkes júrgizilgen. Bul jerde eshqandaı zań buzýshylyq joq. Óıtkeni, Halyqaralyq antıdopıng agenttiginiń erejesi 
bar. Kez-kelgen Halyqaralyq jarysta alynǵan dopıng synamalary 10 jyl saqtalady jáne ol kez-kelgen ýaqytta qaıta tekseriledi. Soǵan súıenip otyr ǵoı. Bul eshqandaı zań, ereje buzýshylyq emes jáne bul jerden eshqandaı saıası astar izdeýdiń qajeti joq. Eger de Reseıdiń Batysqa salǵan sanksıalarynyń kesiri tıip jatyr deıtin bolsaq qate bolady. Múmkin dál osy aýyratletıkaǵa kelgen kezde bizden qaıtaryp alatyn úsh altynnyń úsheýi de Reseı sportshylaryna tıesili bolady. Eger Ilın, Maneza jáne Podovedova qaıtaryp beretin bolsa, jaǵdaı Reseıdiń paıdasyna sheshiledi. Al Reseı atletterine de buıyrmaı, qola alǵan sportshylarǵa buıyrady dese, onda múldem basqa jaǵdaı bolady. Sondyqtan bul jerde Halyqaralyq aýyratletıka federasıasy naqty sheshim shyǵara almaı otyr. Sportshylarymyzdyń Rıo olımpıadasyna qatysýy ekitalaı. Sebebi úlgermeıdi. Barlyǵy Halyqaralyq olımpıada komıtetiniń tártiptik keńesiniń sheshimine baılanysty. Biraq, eshqashan aýyratletıkada bolsyn, basqa sport túrlerinde bolsyn, jarystan shettetilgen sportshylardyń qaıtyp kelýi óte qıyn. Buny Ilın de, basqa úsh atletimiz de jaqsy túsinedi. Ilınniń Rıo olımpıadasyna úlgerýi ekitalaı. Endigi maqsat – qalǵan tórt altyndy saqtap qalsaq, munyń ózi jetistik bolar edi. Al Qazaqstan quramasyn bir jylǵa shettetý aıtylǵanmen, naqty qaı ýaqytta júzege asatyny belgisiz. Iaǵnı shekteý ýaqyty kórsetilmegen. Rıo olımpıadasyna qatyspaıdy dep aıta almaımyz. Ony tipti Halyqaralyq aýyratletıka komıteti de sheshe almaıdy. Sheshimdi HOK aıtady. Ondaǵylar buny qarap, óz sheshimin jaqynda shyǵarady. Biraq, sol bir jylǵa jarystan shettetiledi. Ol múmkin Rıo olımpıadasynan keıin kúshine enýi múmkin. Bir belgili nárse – Qazaqstan Rıo olımpıadasyna 10 atlet apara almaıdy. Al Ilınniń qatysýy 1 paıyzdy ǵana quraıdy. Ilınniń bapkeri Erjas Boltaev ta bul jarysqa úlgermeıtinin aıtty ǵoı. Múmkindik óte az. Maneza, Chınshanlo men Podovedovalar qatysyp jatqannyń ózinde Ilındi jibermeýi múmkin. Sondyqtan, biz jalpy quramanyń olımpıadaǵa qatysýyn tileýimiz kerek.
