Qazaqstannyń BUU Qaýipsizdik keńesiniń 2017-2018 jyldardaǵy turaqty emes músheligine saılanýyna baılanysty Qazaqstan Respýblıkasynyń Prezıdenti N.Á.Nazarbaevtyń úndeý jarıalady, - dep habarlaıdy Qamshy.kz Aqordanyń resmı saıtyna silteme jasap.

Úndeýdiń tolyq nusqasy:

Qymbatty otandastar!

Qazaqstan Táýelsizdiginiń 25 jyldyǵy belesinde taǵy bir mańyzdy tarıhı oqıǵa boldy.

Elimiz Birikken Ulttar Uıymy Qaýipsizdik Keńesiniń 2017-2018 jyldardaǵy turaqty emes músheleri quramyna endi.

Bul Keńes – Birikken Ulttar Uıymynyń Jarǵysymen «halyqaralyq beıbitshilik pen qaýipsizdiktiń basty jaýapkershiligi» júktelgen, turaqty jumys jasaıtyn organ.

Elimizdiń oǵan saılanýy – Qazaqstannyń halyqaralyq arenadaǵy bedeli men eńbeginiń moıyndalýy degen sóz.

Bizdiń elimiz beıbitshilikti, qaýipsizdikti jáne ornyqty damýdy jaqtaıtynyn táýelsizdik jyldarynyń bárinde óziniń naqty isterimen dáleldep keledi. Ony barshańyz bilesizder.

Semeı ıadrolyq polıgonyn jabý  jáne qýaty jóninen tórtinshi  zymyrandyq-ádrolyq arsenaldan bas tartý týraly sheshimimizdi búkil jer shary biledi jáne qoldaıdy.

Bizge álemdik qoǵamdastyqtyń mundaı senim kórsetýi memleketimizdiń qarqyndy damýyna jáne bereke-birligimizge de baılanysty.