Óskemen qalasyna jasaǵan sapary aıasynda «AzıaAvto Qazaqstan» avtokólik qurastyrý zaýytynyń qurylys alańyn aralap kórgen Memleket basshysy Nursultan Nazarbaev mashına jasaý salasy ındýstrıalandyrýdyń basty shebi ekenin atap ótti, - dep habarlaıdy Qamshy.kz QazAqparatqa silteme jasap.

«Árıne, álem boıynsha ne kóp, mashına kóp shyǵarylyp jatyr. Báseke myqty. Biraq, biz sapa boıynsha da, baǵa boıynsha da básekege shydaýymyz kerek, osylaısha, kórshilerimizdiń barlyǵyna kóligimizdi satý qajet. Qazir alǵashqy kezeńde alpys myń avtokólik, kelesi kezeńde taǵy alpys myń avtokólik shyǵaramyz. Qıyn jaǵdaıǵa qaramastan, memleket sizderge kómektesedi»,- dedi Prezıdent «Azıa Avto Qazaqstan» AQ dırektorlar keńesiniń tóraǵasy Anatolıı Balýshkınniń esebin tyńdaǵan soń,

A.Balýshkınniń aıtýynsha, alánstyń sheshimine saı, Mońǵolıa, Qyrǵyzstan, Túrkimenstan elderiniń naryǵy tolyqtaı Qazaqstannyń jaýapkershiligine berilgen. Qazan aıynda Grýzıa jáne Ázirbaıjan elderimen kelisimshart jasaý josparlanyp otyr. Eksperıment retinde, Birikken Arab Ámirlikteriniń de naryǵyna avtokólik satýǵa qosymsha múmkindik  berilmek eken.

«Osylaısha, halyqaralyq kompanıaǵa aınalasyńdar. Jaraısyńdar! Mashına qurastyrý salasy el ekonomıkasyndaǵy jańa sala jáne ol elimizdiń shyǵysynan bastaý almaq», - dedi Memleket basshysy.