Keshe birqatar aqparat quraldary Úkimet otyrysynda oryn alǵan bir jaǵdaıdy jarysa jazdy. Premer-mınıstrge atqarylǵan jumystar týraly esep berip otyrǵan birinshi orynbasary Baqytjan Saǵyntaev Tájikstan basshylyǵymen transshekaralyq ózender máselesine qatysty bolǵan kelissózdiń birqatar jaı-japsaryn aıtyp qaldy.
«Táshkende áriptestermen áńgime body: Tájikter ne usyndy? Mynaý biz kelisip jatqan jospar. Byltyr men Qyrǵyzstanmen energetıka, taýar aıyrbasy jóninde jumys istegenmin. Tájikter: «Bizben de solaı kelisseńder qyrǵyzdarmen baılanysyp kerek emes. Sýdy biz ózimizden jiberemiz», - deıdi», - degen bolatyn ol otyrysta birinshi vıse-premer osy máselege oraı Ońtústik Qazaqstan oblysy ákiminiń jumysyna pikir bildire otyryp.
Osyny aıtyp otyrǵan B. Saǵyntaevtyń sózin Premer-mınıstr K. Másimov bólip, eskertý jasaıdy.
«Biz jarıa keńistikte otyrmyz. Abaı bolyńyz», - degen premer eskertýinen soń B. Saǵyntaev keshirim surap, sózin kilt toqtatady. Osy sát Úkimet otyrysyn túsirgen beınekameralarda jazylyp, kóp uzamaı aqparat quraldarynda da jarıalandy.
Artynsha qyrǵyzdyq BAQ ta qazaq sheneýniginiń osy sózderin synǵa ala bastady.
Osy oraıda mynadaı oı týady. Árıne, áriptestik, baýyrlastyq qatynasy berik ornaǵan, tarıhymyz ortaq, tanym, mádenıetimiz uqsas Qyrǵyzstan men Tájikstannyń arasynda túsinbeýshilik týyp, alaýyzdyq ornaǵany bizge qajet emes. Biraq, osyndaı aqparattyq qıturqylyqtar sondaı kıkiljińge sebep bolýy da múmkin ǵoı. Saǵyntaev ashyq jıyn ústinde bizben energetıka máselesinde kelissóz júrgizgen bir eldiń ekinshi elge qatysty kózqarasyn aıtyp otyr. Bar bolǵany Qyrǵyzstanǵa qatysty Qazaqstannyń emes, tájik basshylarynyń ustanymyn jetkizdi. Osy jerde Saǵyntaevtyń dıplomatıalyq talaptardy eskermeı, sózden súringen tusyn jer jahanǵa jarıalaý kimge qajet boldy? Otyrysty túsirip jatqan aqparat quraldarynan (olardy Úkimetten táýelsiz dep taǵy aıta almaısyz) premer men orynbasary arasynda bolǵan álgi dıalogtyń jarıalanbaýyn ótinse mundaı shý bolmas edi ǵoı. Premerdiń salǵan tyıymy orynbasaryna qatysty bolǵanda, Úkimetke baǵynatyn BAQ-qa qatysty emes pe? B. Saǵyntaevtyń premer eskertýinen soń kilt úzilgen, aıaqsyz qalǵan sholaq sózin BAQ-ta jarıalaý qandaı maqsat kózdeıdi? Bul Úkimettiń ekonomıka, qarjy, ındýstrıa, ınovasıa, energetıka syndy mańyzdy salalaryna basshylyq jasap otyrǵan salmaqty sheneýniktiń bedelin túsirýge baǵyttalǵan astyrtyn shabýyl emes pe?
Baqytjannyń bedeli týraly sóz qozǵaýymyz tegin emes. Buǵan deıin B. Saǵyntaev Asqar Myrzahmetov mınıstr laýazymyna premer-mınıstrdiń orynbasarlyǵyn qosa alǵanda da osyǵan deıin bes otyrysyn ótkizgen Jer komısıasynyń jetekshiliginen alynyp tastaldy. Muny keı aǵaıyn áldebir toptar Saǵyntaevtyń qazaq úshin ózektiligi joǵary jer máselesin talqylaǵan jıyn arqyly halyq aldyndaǵy abyroıynyń artyp ketýinen qaýiptendi dep júr. Qalaı bolǵanda da B. Saǵyntaevtyń bet-bedeli biraz kisige ýaıym bolǵan sıaqty. Al, keshegi jaǵdaıdy «Saǵyntaevty súrindirý» operasıasynyń jarıa túrdegi kórinisi deımiz be?
Jomart Abdollauly
