Oralmandardyń kvota alýy ońaılaıtyn boldy, - dep habarlaıdy Qamshy.kz 31-arnaǵa silteme jasap.

Yqtıarhat pen azamattyq arasynda sendelgen qandastarǵa qýanyshty jańalyq bar. Toqtap qalǵan kvota oralmandarǵa qaıta beriletin boldy. Sondaı-aq, endi azamattyq ta bir jyldan keshiktirilmeı berilýi mindet. Osylaısha, kútpegen jerden batyl qadamǵa barǵan sheneýnikter, tipti jumys pen baspana máselesin de sheship beremiz dep ýádeni úıip tógip jatyr. Biraq, ol úshin shetelden kelgen qazaqtar úkimet belgilep  bergen oblystarǵa ǵana barýlary tıis eken. 

Atamekenge kelip Qazaqstan azamattyǵyn ala almaı júrgen Madına Darhanbaeva  bul jańalyqty qýana qabyldady. Óıtkeni, tólqujatqa qol jetkize almaǵan soń, aýyr dertke ushyraǵan búldirshinin  de tegin emdete almaı júrgenine birneshe jyl bolǵan.  Aıtýynsha, dárigerlerge barǵanynda,  azamattyǵy joqtarǵa  ota tek aqyly túrde jasalady degen.  Al, balasyna  jany aýyrǵan otbasy Aıanany aıaǵynan turǵyzýǵa shamasy jetpeı otyr.

MADINA DARHANBAEVA:

- El qatarly adam sıaqty aıaǵynan júrip ketsin qyzym. Aıtarym sol. Kómekterińdi berińder adamdar.

Endi  Madına Darhanbaeva sıaqty aǵaıynǵa azamattyq 1 jyldyń ishinde esh kedergisiz berilýi mindet. Buǵan deıin shetelden kelgen qandastarǵa yqtıar hat pen banktegi esepshotta qarjysy bolýy talap etilgen. Bul shekteý de alynyp tastaldy. Biraq, zańǵa taǵy bir jańa ózgeris engizildi. Iaǵnı  jumys pen baspana jáne memlekettik kvotaǵa iligý  úshin úkimet belgilegen tek jeti oblysqa barýlary tıis.  Naqtyraq aıtqanda Aqmola oblysynda 120 adamǵa, Atyraý oblysynda 28 adamǵa, Shyǵys Qazaqstan oblysynda 260, Qostanaı oblysynda 21 adamǵa tegin kvota qarastyrylǵan. Al, sany jaǵynan kvotanyń eń kóbi elimizdiń soltústigine berilmek.

KÚLSİM YSQAQOVA, Almaty qalasy Memlekettik eńbek ınspeksıasy jáne kóshi-qon basqarmasynyń bólim basshysy:

- Pavlodar oblysyna 690, Soltústik Qazaqstan oblysynda 108 adam óńirlik kvotany paıdalanýǵa múmkindikteri bar. Ol úshin osy aıtylǵan oblystarǵa baryp ótinishterin qaldyrýlary kerek.

Alaıda, ótinishter qabyldanyp jatyr dep eldi eleń etkizgen  eńbek ıspeksıasynyń bastamasyna kúdikpen qarap otyrǵandar kóp. Qujattar sóz júzinde qabyldanyp jatqanymen, kóshi-qonnyń  aldyndaǵy qyp-qyzyl daý áli basylǵan joq deıdi qandastardyń ózderi.

GÚLNAZ BAQTIARQYZY:

- Áýezov aýdanyna baryp keshe suraǵanymda áli berilip jatqan joq dedi. Sóz júzinde ǵana barlyǵy. Qujatty qabyldap jatqan joq eshkim.

Zańdaǵy ózgertýlerge sensek, atamekenine oralyp, jyldap azamattyq ala almaı júrgenderdiń endi joly bolýy tıis. Darhanbaevtar otbasy da bastalǵan istiń qaǵazbastylyqqa salynbaı, jyldam júzege asaryna  úmitti.  Óıtkeni kishkentaı Aıananyń emi ýaqyt kúttirmeıtin másele.

MADINA DARHANBAEVA, Oralman:

- Tórt jasqa deıin jasatý kerek. Áıtpese keshigip qalamyz. Qyzym ómir baqı osylaı bop qalady.