Búgin Parlament palatalarynyń birlesken otyrysynda Májilis depýtaty Omarhan Óksikbaev sáláfızmge tyıym salý máselesine qatysty óz oıyn bildirdi, - dep habarlaıdy Qamshy.kz Baq.kz-ke silteme jasap.

«Endi, ony qazir olaı-bylaı bolady dep aıta almaımyn. Jalpy, sáláfızmniń óziniń ıdeologıasy bir keremetteı teris dep aıtqym da kelmeıdi. Sebebi Saýd Arabıasy memleketi osy baǵytty qoldap, dinderinde qoldanyp júr. Onyń ózinde radıkalızmniń eshteńesi kórinip turǵan joq. Bizde sony burmalap alyp ketetin, sonyń atyn jamylyp, biraq basqa baǵytta adamnyń ómirine qaýip keltiretin, memleket qurylymyna qaýip tóndiretin máseleler ol basqa dúnıe. Sondyqtan ol mynaý qoıdyń terisin jamylyp alǵanymen qasqyr qoı bolmaıdy. Iá, sondyqtan ishki qurylysyn bilýimiz kerek. Sol sebepti zańda, jalpy qabyldanatyn sheshimder de sol ishki qurylysyn tanyp baryp, jasalýy qajet dep oılaımyn», - deıdi depýtat O. Óksikbaev.

Aıta keteıik, kúzde depýtattar dinı birlestikterdiń qyzmetin retteýge arnalǵan zań jobasyn qaraýdy josparlap otyr. Depýtat Máýlen Áshimbaevtyń oıynsha, sáláfızmge qarsy biz óz ıdeologıamyzdy qoıýymyz qajet. Al Dosaı Kenjetaıdyń sózine qaraǵanda, sáláfızmge tyıym salynsa, elimizde qantógister bolýy ábden múmkin. Degenmen, Qazaqstannyń kúsh qurylymdary osy bastamaǵa daıyn bolsa, atalǵan aǵymǵa eshbir qıyndyqsysh tyıym salýǵa bolady.

Al, búgin UQK basshysy 26 maýsym kúni qaraǵandy oblysynda lańkestik áreket jasaýdy josparlady degen kúdikpen tutqyndalǵan 6 kúdikti men ustaý kezinde ózin jaryp jibergen bir kúdiktiniń sáláfızm aǵymyn ustanatyn top ókilderi ekenin habarlady.