Almatydaǵy qısaıǵan úıdiń turǵyndaryna jyl sońyna deıin basqa páterler beriledi, - dep habarlaıdy Qamshy.kz «Almaty» arnasyna silteme jasap.
«Alǵabas-6» yqshamaýdanyndaǵy aýytqyǵan 9 qabatty úıdiń taǵdyry osy aptada sheshiledi. İrgesi sógilip, bir qaptalyna qısaıǵan úıge saraptama jasaǵan jumys komısıasy aldaǵy bir-eki kúnde óz sheshimin jarıalaıdy. Sonyń nátıjesinde qısaıǵan úıdi qalypqa keltirý ne bolmasa súrý týraly naqty sheshim qabyldanbaq. Bul týraly arnamyzǵa Alataý aýdanynyń ákimi Baǵdat Mánizorov habarlady.
Qazir «Alǵabas» yqshamaýdanyndaǵy jalpy sany 97 úıdiń barlyǵynda tolyqtaı tekserý jumystary júrgizilýde. Baspanalardy salǵan qurylys kompanıalary 15 shildege deıin ózderi turǵyzǵan nysandardyń sapasyn tekserip, kem-ketigin túzetedi. Shatyrlar men sý júıesin jóndep, kóriktendirý jumystaryn júrgizý mindetteldi. Al, qısaıǵan úıdi salǵan «Astana qurylys» merdiger kompanıasy 1 shildeden bastap osy aýdanda eki turǵyn úıdi salýǵa kirisedi. Onyń bireýi qulaǵaly turǵan úıden kóshirilgen turǵyndarǵa beriledi.
«Týra osy jobamen «Astana qurylys» kompanıasy jumys bastaıdy, eki úı salady. Ekinshi úıdi ótemaqy retinde berýi múmkin, qalaǵa satady múmkin, ózderiniń qalaýynsha. Al, birinshi úıge qısaıǵan úıdiń turǵyndaryn birinshi jeltoqsanda kirgizem dep ýáde berip, tórt jaqty kelisimge kelip jatyrmyz. Qurylys jumystary 1 shildede bastalady. 16 jeltoqsanǵa deıin tolyq kirgizip, bitiremiz degen ýádelerin berip otyr. Al, tipti bolmaǵan jaǵdaıda 10- 20 kún aıyrmashylyq bolatyn bolsa, qurylys mekemesi kompensasıasyn uzartady», - dedi Almaty qalasy Alataý aýdanynyń ákimi Baǵdat MÁNİZOROV.
Eske salaıyq, 1 maýsymda «Alǵabas-6» yqshamaýdanynda memlekettik baǵdarlamamen salynǵan 72 páterli 9 qabatty úı 34 sm-ge shalqaıyp, ondaǵy 400 -ge jýyq turǵyn qaýipsiz jerge kóshirildi. Sapasyz qurylystyń saldarynan, jyly uıasyn tastaýǵa májbúr bolǵan turǵyndar qazir merdiger kompanıa bergen ýaqytsha páterlerde turyp jatyr. Olarǵa «Astana qurylys» kompanıasy óz esebinen 50 myń men 80 myń teńge aralyǵynda ótemaqy tóledi.
