Búgin Májilis depýtaty Omarhan Óksikbaev sáláfızm aǵymy anaý aıtqandaı qaýipti emes degen sıaqty oı aıtypty. Osyǵan baılanysty mynadaı suraqtar týady.

Birinshiden, O. Óksikbaev myrzanyń elde UQK, İİM júrgizip jatqan tergeý amaldary aıaqtalmaıynsha mundaı málimdeme jasaýyna ne túrtki boldy? Odan jýrnalıser sońynan qalmaı suraıtyndaı ımam emes, teolog emes.

Ekinshiden, depýtat sáláfızmdi ustanyp otyrǵan Saýd Arabıasyn mysalǵa keltirip, tipti, úlgi retinde usynǵandaı bolypty. Onyń «Jalpy, sáláfızmniń óziniń ıdeologıasy bir keremetteı teris dep aıtqym da kelmeıdi. Sebebi Saýd Arabıasy memleketi osy baǵytty qoldap, dinderinde qoldanyp júr. Onyń ózinde radıkalızmniń eshteńesi kórinip turǵan joq», - degen sózderin qalaı túsinýge bolady? O. Óksikbaev mamandyǵy boıynsha ekonomıs pe, teolog pa? Eń qurymaǵanda arab memleketterinde elshilikte bolyp pa? Bóten eldiń ishki júıesin nege Qazaqstanǵa úlgi retinde usynady?

Depýtat «Bizde sony burmalap alyp ketetin, sonyń atyn jamylyp, biraq basqa baǵytta adamnyń ómirine qaýip keltiretin, memleket qurylymyna qaýip tóndiretin máseleler ol basqa dúnıe», - degen sózderimen ne aıtqysy keledi? Aqtóbedegi teraktige qatysty Elbasynyń aıtqany qaıda qalady?

Osynyń aldynda Serik Aqylbaı degen senator da balaq kesken, saqal ósirgenniń bári terrorshy emes degenge saıatyn oı aıtyp, eldi adastyrmaq boldy. Ol depýtat aıtyp aýyz jıǵan joq, Aqtóbede lańkester lań saldy. Olardyń balaǵynyń qanshalyqty «uzyn» ekenin kórdik.

Iá, Saýd Arabıasynyń sáláfızmdi ustanatyny búginde eshkimge jasyryn emes. Memlekettik júıesi, memlekettik organdardyń jumysy barlyǵy sáláfılik, ýahabtyq ustanymdaǵy sheıhtardyń pátýalaryna negizdelgen. Ol endi sol eldiń ishki sharýasy. Oǵan biz aralasýǵa, baǵa berýge haqymyz joq. Biraq, myna jaǵdaıdy eskerýimiz kerek. O. Óksikbaev úlgi etip otyrǵan Saýd Arabıasynyń múftıi Sheıh Abdýlazız ash-SHeıh kezinde Izraıl men Palestına arasyndaǵy qaqtyǵysta Izraıl jaǵyn qoldap, oǵan qarsylyq kórsetken musylmandardyń isin «haram» dep pátýa shyǵarǵan. Bul múftıdiń Sırıadaǵy lańkesterdiń áreketine de qasıetti soǵys «jıhad» dep baǵa bergenin bilemiz. Sondaı «ǵulamalardyń» bizdiń elimizde oryn alǵan lańkestik áreketterdi de «qasıetti soǵys» dep otyrmaǵanyna kim kepil?

Sol arab yqpalyndaǵy aǵymdardyń ókilderi onsyz da namaz oqymaıtyn ata-analaryn, jaqyn týystaryn kápir dep, úıleriniń berekesin alyp jatqany, tipti, otanyn tastap Sırıa, Irakqa soǵysqa ketip jatqanyna qansha jyl boldy? Musylmandyǵynan dórekiligi asyp túsetin sol baýyrlar qazir ózderiniń sáláfı ekenin ashyq aıtyp júr. Ashyq aıtýynyń sebebi de túsinikti. Májiliste qoldaýshylary bar...

Iahıa Júsip