Qazaqstan Respýblıkasy İshki ister mınıstrligi Shyraqbek Qabylbaev atyndaǵy Qostanaı akademıasynyń kýrsanttary seıildemede júrgende dúken tonaǵan uryny ustap aldy, - dep habarlaıdy Qamshy.kz akademıanyń baspasóz qyzmetine silteme jasap.
Akademıanyń 3 kýrs kýrsanttary polısıa kishi serjanty Ǵalymjan Turlybaev pen polısıa qataryndaǵy Aljan Galıev seıildemede júrip, Abaı dańǵyly, №12 úıde ornalasqan «Sherhan» azyq-túlik dúkeni satýshysynyń kómekke shaqyrǵan daýysyn estıdi. Daýys shyqqan jaqqa qaraı júgirip barǵan olar, atalǵan dúkennen urlyq jasap, sytyla qashqan orta jastaǵy quqyq buzýshyny baıqaıdy jáne jedel áreket ete otyryp, kúdiktini qolǵa túsiredi. Odan ári jedel baqylaý ortalyǵynyń «102» nómirine habarlasyp, quqyq buzýshyny Qostanaı qalasy İİB qyzmetkerlerine tapsyrady.
Bul kýrsanttardyń qabyldaǵan anttaryna beriktigin jáne kez kelgen quqyq buzýshylyqtyń jolyn kesýge degen yntalarynyń asqaqtyǵyn kórsetti. Sonymen qatar, olar, tańdaǵan mamandyqtarynyń asa qaýiptiligine qaramastan, árqashan azamattardyń qorǵaýshysy ekendikterin jadynda ustaıtynyn dáleldeı bildi. Kýrsanttardyń kórsetken kómegin Qostanaı oblysy İİD jáne Shyraqbek Qabylbaev atyndaǵy Qostanaı akademıasynyń basshylyǵy joǵary deńgeıde baǵalap, olardy marapattaýǵa usyndy.
Aıdyń–kúnniń amanynda beıbit ómir keshýshilerdiń qaýipsizdigin qamtamasyz etemin dep oılamaǵan bizdiń kýrsanttar aıtarlyqtaı erlik jasady. Eger olar aıqaılaǵan daýysqa eleń etpeı, uryny ýaqytynda ustamasa, ol adam basqa da aýyr qylmysqa barar ma edi. Jas ta bolsa er júrektik tanytqan bizdiń batyrlarymyzdyń biri Ǵalymjan Turlybaevtan istiń mán – jaıy týraly baıandap berýin suraǵan edik.
- Ǵalymjan bolǵan isti tolyqtaı baıandap bershi, oqyrmanǵa túsinikti bolsyn?
- Biz, Áljan ekeýimiz, seıildemege shyǵyp, jaı áńgimeselip kele jatqanbyz. Bir ýaqytta uryny ustańyzdar, kómektesińizdershi!, - degen bizge qarata aıtylǵan sózdi estidik. Sol jaqqa moıyn burǵanymyzda, janushyra kómek surap aıqaılap turǵan dúken satýshysyn kórdik. Sol sátte qolynda zaty bar uryny da kórip úlgerdik. Oǵan zańdy túrde: «Toqta!», dep úsh ret aıqaıladyq. Ol toqtamady. Sodan, Áljan ekeýimiz qýyp jetip, ustap aldyq. Ol bizge qarsylyq kórsetip, men eshtene urlaǵan joqpyn, dep aqtala bastady. Al biz oǵan júr, ana satýshynyń qasyna baraıyq, mán-jaıdy túsindiresiń dep, qarapaıymdylyq tanyttyq. Ol bizge baǵynbaı, balaǵat sózder aıta bastady. Al biz Akademıada alǵan teorıalyq bilimimizdi jáne qylmyskerdi zalalsyzdandyratyn jaýyngerlik tásilimizdi qoldanyp, onyń qarsylyq kórsetpeýin aıtyp, ustap turdyq. Sosyn satýshy kelip, JBO «102» nómirine habarlasyp, kezekshi polısıa qyzmetkerlerin shaqyrdy. İshki ister qyzmetkerleri kelgen soń, biz olarǵa ustalǵan uryny tapsyryp, ári qaraı jónimizge kettik. Al keıin ne bolǵanyn bilmeımiz.
Oqý ornyna kelip, barlyq mán-jaıdy kýrs bastyǵy polısıa maıory Vasılıı Vasılevıch Zavarykoǵa baıandadyq, - deıdi kishigirim erlik jasaǵan 3 kýrs kýrsanty polısıa kishi serjanty Ǵalymjan óz áńgimesinde.
Bir qaraǵanda túkke turǵysyz másele dep oılaıtyn shyǵarsyzdar, al dúkenshi úshin úlken abyroı. Óıtkeni bir aılyq azyq-túlikti urlaǵan uryny ustamaǵanda, álgi satýshynyń bala-shaǵasy bir aı boıy ash-jalańash otyrar edi. Tabandylyq, erlik, qaısarlyq tanytqan jas kýrsanttar úshin jáne akademıamyz úshin úlken erlik, abyroı dep oılaımyz.
Eger ury buryn sottalǵan nemese nashaqor bolyp, bizdiń kýrsanttarymyzdy jazataıym etse she? Onda ne aıtamyz, Sizderge?.. Biraq abyraı bolǵanda, Áljan men Ǵalymjan ondaıǵa, álsizdikke, jaýapsyzdyqqa jol bermeı, ózderiniń naǵyz eli úshin adal qyzmet kórsetetinderin taǵy bir dáleldedi.
Maqalamdy jazyp bolǵan soń, men Qostanaı oblystyq İshki ister departamentiniń baspasóz qyzmetine habarlasyp, jaǵdaıdyń anyq-qanyǵyn suraǵan edim. Meniń saýalyma İİD baspasóz qyzmetiniń bas mamany Balslý Alekenova tómendegi aqparatty baıandap berdi.
-Ia, Sizderdiń kýrsanttaryńyzdyń jedel qımylynyń arqasynda dúken tonaýshy ury qolǵa tústi. Ol buryn birneshe ret urlyq jasap, qylmystyq jaýapqa tartylyp, sottalǵan, 1994 jyly týǵan. Qazir oǵan qatysty sotqa deıingi tergep-tekserý isteri júrgizilip jatyr.
Osyndaı kez kelgen bolashaq polısıa qyzmetkerleriniń qyraǵylyǵy men antyna degen beriktigi - el tynyshtyǵy men beıbitshiligimizdiń saqtalýyna qosylar eleýli úlestiń biri dep bilemiz.
Meıram Ospanov
Qazaqstan Respýblıkasy İshki ister mınıstrligi Shyraqbek Qabylbaev atyndaǵy Qostanaı akademıasynyń baspasóz hatshysy
