Aqtóbede sot qala turǵyny Serik Arystanovty uıymdastyrylaıyn dep jatqan terakt týraly bilse de, bul týraly habarlamaǵany úshin eki aıǵa qamaýǵa aldy, - dep habarlaıdy Qamshy.kz Tengrinews.kz -ke silteme jasap.

Qylmystyq istiń materıaldaryna silteme jasaǵan basylymnyń málimetinshe, terakt bolǵan kúni (2016 jyldyń 5 maýsymynda - Avt.) Arystanov 45 radıkaldyń iginde bolǵan, olar Eset batyr kóshesindegi jaldamaly páterge barǵan. Sol úıde DAISH-tyń múshesi "Sheıh Adnanıdiń" jazbalaryn tyńdaǵannan keıin 25 adam "qarýly jıhad" jasaýǵa kelisim beredi. Olardyń ishinde Arystanov ta bolǵan.  

"Páterden shyqqannan keıin Dmıtrıı Tańatarov (teraktige belsendi qatysýshylardyń biri - Avt.) "Pallada" qarý-jaraq dúkenine shabýyldyń josparyn aıtqan jáne árkimge tıisti rolderdi belgilep bergen. Osydan keıin Tańatarov bastaǵan top "Pallada" dúkenine qaraı ketken. Arystanov solarmen birge bolǵan, alaıda qarý-jaraq dúkenine kireberiste ol raıynan qaıtyp, qylmys jasaýdan bas tartqan. Osylaısha, aqtóbelik tártip saqshylarynyń aıtýynsha, Arystan qylmystyq jaýapkershilik arqalaıtynyn bilip, terorızm aktisi týraly aldyn ala bilse de, bul qylmys týraly quqyq qorǵaý organdaryna habar bermegen", - dep jazady basylym. 

Arystanovqa qatysty QR Qylmystyq kodeksiniń 434-baby boıynsha ("Qylmys týraly habarlamaý") qylmystyq is qozǵaldy. Bul bap boıynsha alty myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne alty jylǵa deıingi merzimge bas bostandyǵyn shekteýge ne sol merzimge bas bostandyǵynan aıyrýǵa jazalanady.

"Dıapazon" gazetiniń málimetinshe, Serik Arystanov 28 jasta. Ol teplovoz mashınısi bolyp jumys istegen. Er adam 29 tamyzǵa deıin qamaýda bolady.