Almatyda týrıserdi sheteldegi demalyssyz qaldyrǵan kelinshek 3 jylǵa sottaldy, - dep habarlaıdy Qamshy.kz KTK arnasyna silteme jasap.
San soǵyp qalǵan azamattardyń ishinde Almaty, Shymkent, Atyraý men Aqtaý qalasynyń turǵyndary jáne týragentter de bar. Ózin týrfırma basshysymen dep tanystyrǵan Ǵalıa Sharapova jurttan shamamen 60 mln teńge jınap, izin sýytqan. Búgin sýdıa sottalýshynyń emshektegi balasy baryna qaramastan, osy iske núkte qoıdy.
Túrkıadaǵy eń qymbat qonaqúılerge jaıǵastyryp, umytylmas demalys uıymdastyryp beremin dep, jurtty san soqtyrǵan Ǵalıa Sharapova búgin sot zalynda ózin baısaldy ustady. Ol eki jyl boıy ýaqyty kórsetilip, týrıstiń atyna tirkelgen bólme men ushaq bıletterin satqan. Biraq barlyǵy jalǵan bolyp shyqty. Aldanǵan týrıser polısıaǵa shaǵymdanǵan soń tergeý bastalyp, pysyqaı kelinshek qamaýǵa alynǵan. Biraq aıaǵy aýyr bolǵan soń, bostandyqqa jiberilipti. Al búgin sot onyń sol emshektegi balasy bolǵanyna qaramastan jeńildik jasaǵan joq.
-3 jylǵa bas bostandyǵynan aıyrylyp, barlyq múlki tárkilensin. Jazasyn jalpy tártiptegi kolonıada óteıdi. Jáne 6 jyl týrızm salasynda jumys istemeıtin bolsyn.
Jalpy bul kelinshektiń jylmysqy áreketinen 80 adam san soǵyp qalǵan. Biraq polısıaǵa aryzdy sonyń tek 11-i jazypty. Demalysy daýǵa ulasyp, sotpen aıaqtalǵan sol týrıser búgingi úkimimen kelispeı otyr.
Svetlana Aıtmuratova, jábirlenýshi:
-Bizge úlken materıaldyq jáne moraldyq shyǵyn kórdik. Jábirlenýshilerdiń barlyǵy sot úkimimen kelispeıdi. Sebebi, bizdiń shyǵyndarymyz ótelgen joq. Osyndaı qylmys jasaǵany úshin keminde 5 jyl túrmede otyrýy kerek edi.
Al keltirilgen materıaldyq shyǵyn kólemi 60 mıllıon teńgege. Qyrýar qarjyny úptep ketken Ǵalıa Sharapova týragenttikterdiń birinen málimetter urlasa, kelesisinde joldama jasaǵan. Qylmysy áshkere bolǵan ol sot úkimin estigen soń kishkentaı balasyn syltaýratyp, jaýap bergisi kelmedi.
-Balamnyń pampersin aýystyrýǵa bola ma?
-Árıne.
-Meni túsirýdi doǵaryńdarshy.
Emizýli balasyn ózimen birge temir torǵa ala ketken Ǵalıa Sharapovanyń múlki tárkilenip, keltirilgen materıaldyq shyǵyn ótelmek. 8 aılyq balasyn óz erkimen týystarynyń qaraýyna bermegen jaǵdaıda ol balalar úıine ótkiziletin bolady.
