Aqordadaǵy Qaýipsizdik keńesiniń jıynynda ishki ister mınıstri Qalmuhanbet Qasymov Prezıdentke Almatydaǵy oqıǵanyń hronologıasyn aıtyp berdi, - dep habarlaıdy Qamshy.kz Tengrinews.kz -ke silteme jasap.
Naqtyraq aıtqanda, Qasymov Nursultan Nazarbaevqa almatylyq atqyshtyń ótken túnde adam óltirgenin habarlady. İİM basshysynyń aıtýynsha, kúdikti jezóksheni óltirgen.
"Túngi saǵat 3.52-de ol áıeldi óltirdi. Bizde kýágerler bar, ol jeńil júristi qyzdarmen janjaldasqan, olardyń biri Ózbekstan azamatshasy. Ol qyz otyrǵan kólikke kelip, taksı júrgizýshisinen jaryqty qosýyn surap, tapanshamen oq atqan, keıin kólikti aıdap áketken. Bul kólikti qaza bolǵan qyzben birge taptyq", - dedi mınıstr.
Sonymen qatar, mınıstr lańkespen birge júrgen ekinshi adam jaıly aıtyp berdi.
"Qazir ekinshi adam da anyqtaldy, ol kýáger bolyp shyqty. Qazir onyń qatysy bar-joǵyn anyqtap jatyrmyz. Qarýy tárkilendi, shabýylǵa qatysqandardyń barlyǵy ustaldy", - dep málimdedi İİM basshysy.
Qasymov oqıǵa tizbegin baıandaı otyryp, búgin saǵat 10.54-te belgisiz bireýdiń Almaly aýdandyq İİB-ge kelgenin habarlady. Posttaǵy polıseı qujatyn suraǵan kezde ol tapanshasyn alyp shyǵyp, eki márte oq atqan, sóıtip ony jaraqattaıdy. Keıin ol polıseıdiń avtomat qarýyn alyp, kezekshi bólim jaqqa birneshe ret oq atqan, aýdandyq İİB aýlasynda turǵandarǵa da birneshe ret oq atqan. Osy kezde tórt polıseı jaraqat alǵan, bir azamat (ony mınıstr "bizdiń burynǵy zeınetker" dep atady) qaza tapty.
"Osydan keıin qylmysker kóshege júgirip shyǵyp, kólikke otyrǵan. Biz ekinshi dep eseptegen adamdy kúdikti qorqytyp, Baızaqov kóshesine jetkizýin talap etken. Jol boıynda ol patrúldik polısıa qyzmetkerlerine oq atqan. UQK departamentiniń ǵımaratynyń aldyna kelgen ol kólikten shyǵyp, taǵy da oq atqan, eki qyzmetkerdi jaraqattaǵan. Osy ýaqytta júrgizýshi qashyp ketken. Biz ony taptyq", - dedi mınıstr.
Osydan keıin qylmysker taǵy bir kólikti toqtatyp alǵan, kólikte shekara qyzmetiniń aǵa leıtenanty otyrǵan. "Onymen birge ol Abaı dańǵylyna deıin jetip alǵan, biraq aǵa leıtenant qarsylyq kórsetken bolýy kerek, ol úshinshi meken-jaıǵa kelip jetkende bizdiń kezekshilikte turǵan polıseılermen atysa bastady. Bireýi jaraqat alyp, qaza tapty, ekinshisi ony jaraqattap, qolyna kisen saldy. Tapanshasy men avtomatyn tárkiledi", - dedi vedomstvo basshysy.
