Keshe áleýmettik jeliler arqyly sol kúdiktilerdi ustaý operasıasynyń sýretteri "qoldan qolǵa" tez tarady. Onda ustalǵan azamattyń qaltasynan shyqty delingen bir japyraq qaǵaz jurt tarapynan keń talqylanyp, kúdiktiniń dinı aǵymdardyń birine qatysy bar bolýy múmkin ekeni de aıtylǵan edi. Al, mańǵystaýlyq ımam Ismaıyl Seıitbekov bolsa qaǵazǵa jazylǵan jazba salafızm aǵymynyń aqıdasy boıynsha kálımanyń 7 sharty ekenin aıtyp otyr. Bul týraly ol óziniń Facebook-paraqshasyna jazdy, - dep habarlaıdy Qamshy.kz Skifnews.kz - ke silteme jasap.

«Búgingi Almatydaǵy terrorlyq áreketti jasaǵandar salafıtter ekeni taǵy dáleldendi. Salafıtter ózderin sýdan taza, sútten aqpyz, terrorlyq áreketti jasaıtyndar tákfırler dep, tákfırlerdi jamandaýǵa kirisedi. Al, ustalǵan jigittiń qaltasynan shyqqan qaǵazda Muhammed ıbn Abdýlýahhab negizin qalaǵan ýahhabı, sáláfı aǵymynyń aqıdasy boıynsha kálımanyń 7 sharty jazylǵan. Salafıtter sol sharttarǵa sáıkespegen adamdy musylman sanamaı kápirge, adasqanǵa shyǵarady. Paıǵambarymyzdyń (s.a.ý.) hadısinde mundaı 7 shart joq jáne eshbir janǵa ıslamdy qabyldar kezinde mundaı talap qoımaǵanyn bilemiz. Áhlý súnnet senimi boıynsha Lá ıláhá ıllalah Mýhammadýr rasýlýllah degen adam musylman sanalady. Sol qaǵaz lańkes jigittiń sáláfı ekenine naqty dálel dep sanaımyn. Buǵan sáláfıler ne ýáj aıtar eken?», - deıdi ımam óz sózinde.

Osy rette aıta ketý kerek, keshe keshkisin Memleket basshysynyń tóraǵalyǵymen ótken Qaýipsizdik keńesiniń otyrysynda QR UQK tóraǵasy Vladımır Jumaqanov Almatydaǵy lańkestikti jasaǵan Qyzylorda oblysynyń týmasy Kýlıkbaev Rýslan Alpysuly ekenin aıtty. Kúdikti buǵan deıin eki ret sottalǵan jáne túrmede salafızm ustanýshylarymen tyǵyz baılanysta bolǵan deıdi Ulttyq qaýipsizdik komıtetiniń basshysy.
Al, Almaty qalalyq İİD baspasóz hatshysy Saltanat Ázirbek bolsa atalǵan teraktiniń artynda salafıler tur dep aıtý áli erterek degen bolatyn.