Memleket basshysy Nursultan Nazarbaev jumys saparymen Shyǵys Qazaqstan oblysyna keldi. Jumys saparynyń barysynda Elbasy oblys ákimi Danıal Ahmetovpen birge Óskemendegi oblystyq qan ortalyǵynda jáne «Azıa AVTO Qazaqstan» aksıonerlik qoǵamy kásiporynynda boldy, - dep habarlaıdy Qamshy.kz.

Ótken jyly qoldanysqa berilgen medısına mekemesin aralap kórgen Prezıdent zamanaýı qondyrǵylarmen muzdaı jabdyqtalǵan ortalyqtyń qyzmetimen tanysty. Adam ómiriniń arashashysy degen abyroıly mindetti arqalaǵan aq halatty jandarmen, sondaı-aq, qan tapsyrýshy donorlarmen tildesti. Qazirgi ýaqytta ótip jatqan donor aılyǵy aıasynda qan tapsyrýǵa Óskemendegi 27943 áskerı bóliminiń qyzmetkerleri men sarbazdary da kelgen eken.

– Asa mártebeli Elbasy! Biz áskermiz. Bizdiń mindetimiz Otandy qorǵaý. Biz úshin eń bastysy – eldegi Siz ornatqan tynyshtyqty qorǵaý. Ótkende Aqtóbede bolǵan oqıǵa ol – naǵyz satqyndyq. Qurmetti Nursultan Ábishuly! Siz bizge buıryq berińiz. Ondaı satqyndardyń kózin qurtamyz. Túbimen joıamyz. Memleketti qorǵaý bizdiń paryzymyz, – dedi Elbasymen kezdeskende 27943 áskerı bóliminiń qyzmetkeri, leıtenant Oljas Ábenov.

Sondaı-aq, elimizdiń Prezıdenti, Bas Qolbasshymyz Nursultan Nazarbaev aldynda qatardaǵy sarbazdar Berli Orazalımov pen Dmıtrıı Andrúshenko da sóz sóılep, Otandy qorǵaý jolynda qajet bolsa jandaryn qıýǵa daıyn ekendikterin jetkizdi. 

– Bul árıne durys. Alaıda sizder ómirlerińizdi de saqtap, Otandy da qorǵaýlaryńyz kerek. Qan tapsyrý arqyly qazirdiń ózinde adamdardyń ómirin qutqarýǵa kómektesip jatyrsyzdar. Bul da úlken is, – dep atap kórsetken Memleket basshysy búgingideı aýmaly-tókpeli shaqta eldiń turaqtylyǵyn saqtap, tynyshtyǵyn kúzetý bárinen de mańyzdy ekenin basa aıtty.

Shyǵys-Aqparat