D.Serikbaev atyndaǵy SHQMTÝ-dyń 1-kýrs stýdenti Malıka Ahmetjanova tanymal ánshi Erlan Kókeevtiń jańa jobasyna qatysýǵa shaqyrtý aldy, - dep habarlaıdy Qamshy.kz Altaynews.kz -ke silteme jasap.

Aıta keteıik, Malıka Ahmetjanova Astanadaǵy Beıbitshilik jáne kelisim saraıynda ótken 25-inshi «Jas qanat» respýblıkalyq baıqaýynyń aqtyq synyna deıin ótti. Nátıjesinde, Astana qalasy ákimdiginiń arnaıy júldesine ıe boldy. Baıqaýda Brıtnı Hústonnyń «I have nothing» ánin oryndaǵan jas ánshige Janar Duǵalova alǵysyn bildirip: «Shynymdy aıtsam, osy ýaqytqa deıin Brıtnı Hústonnyń «I have nothing» ánin oryndaýǵa batylym jetpeı júrgen bolatyn. Al búgin seniń nar táýekelge bel býyp, mundaı úlken shyǵarmashylyq týyndyny qoryqpaı oryndaǵan ójettiligińdi kórip, saǵan joǵary baǵa qoıamyn» degen eken. 

Malıka Ahmetjanovanyń aıtýynsha, onyń kásibı mýzykalyq bilimi joq. Sondyqtan, ol ánshilikpen ázirshe tek hobbı retinde aınalysyp júr. 

– Baıqaýǵa qatysqan kezde bastysy jeńis emes, tájirıbe ekenin uqtym. Óıtkeni, munda tóreshilik etetin qazylar alqasy qatysýshylardyń daıyndyǵyn birden baıqaıdy. «Syn túzelmeı, min túzelmeıdi» degendeı bolashaqta ózime qatysty aıtylǵan syndy túzeıtin bolamyn, - deıdi Malıka Ahmetjanova.

Atalmysh baıqaýda «Sulýlyq baıqaýyna qatyssań bas júldeni alasyń. Alaıda, án baıqaýynda aqsańdap tursyń, saǵan áli tyńǵylyqty daıyndyq qajet» dep syn-pikirin bildirgen Erlan Kókeev jas ánshini óziniń jańa jobasyna qatysýǵa shaqyrǵan.

– Atalǵan jobaǵa qatysýǵa kelisim bergen jaǵdaıda Astanaǵa qonys aýdarýyma týra keledi. Sol jaǵy azdap qıyndyq týǵyzyp otyr. Sondyqtan Erlan Kókeevtiń usynysyn oılanyp júrmin, - deıdi Malıka Ahmetjanova.

Ajar Saǵatbekova