Búgin Aqordada Premer-mınıstr Kárim Másimovti qabyldaǵan Memleket basshysy Nursultan Nazarbaev jer reformasy jónindegi komısıa jumysynyń qorytyndysyn usynýdy tapsyrdy, - dep habarlaıdy Qamshy.kz.

Memleket basshysyna eldiń áleýmettik-ekonomıkalyq damýy týraly esep bergen Úkimet basshysy memlekettik baǵdarlamalardyń oryndalysyn baıandady.

Elbasy Kárim Másimovke birqatar naqty tapsyrmalar júktedi.

«Birinshi kezekte ekonomıkalyq kórsetkishterdiń tómendeýine jol bermeý kerek. Ekinshiden, egin jınaý men kúzgi-qysqy mezgilge daıyndyqqa kóńil bólý qajet. Sondaı-aq, EKSPO-2017 kórmesine jáne 2017 jylǵy Ýnıversıadaǵa daıyndyqty jalǵastyrý kerek», - dedi Elbasy.

Halyqtyń ál-aýqatyn arttyrý úshin ındýstrıaldy-ınnovasıalyq damýdy da nazardan tys qaldyrmaý kerektigi eskertildi.

Sonymen birge, Memleket basshysy jaqyn kúnderi jer reformasy jónindegi komısıa jumysynyń qorytyndysyn usynýdy tapsyrdy.

«Tamyz aıynyń sońynda Úkimettiń keńeıtilgen otyrysyn ótkizip, ary qaraıǵy áreketterdi pysyqtaý úshin barlyq kórsetilgen máseleler boıynsha sheshimder shyǵarýdy suraımyn», - dedi Elbasy Jer reformasy jónindegi komısıaǵa qatysty.