Búgin Astana kúni qarsańynda Óskemende 140 oryndyq bolashaq balabaqshanyń ornyna saltanatty túrde kapsýla qoıdy. Jalpy somasy 405 mln. teńgeni quraıtyn áleýmettik joba 2014 jyly Óskemen ákimdigi men Qazaqstandaǵy AES kompanıalar toby jáne «Ortalyq Azıanyń Eýrazıa qory» qol qoıǵan  korporatıvti áleýmettik jaýapkershilik ózara yntymaqtastyq boıynsha memorandým aıasynda júzege asýda.

Balabaqshanyń ornyn Óskemen ákimdigi qala damýynyń bas josparyna sáıkes Mashınostroıtelı kóshesiniń boıynan bóldi. Shaǵyn aýdannyń turǵyndary úshin atalǵan áleýmettik nysanǵa degen suranys joǵary. Balabaqsha ǵımaratynyń qurylysy aıaqtalǵan soń ol qalaǵa tegin syılyq retinde tapsyrylady.  

Sharaǵa SHQO ákiminiń orynbasary  Jaqsylyq Omar, Qazaqstandaǵy AES korporasıasynyń vıse-prezıdenti Dúısen Merǵalıev, «Ortalyq Azıanyń Eýrazıa qorynyń» atqarýshy dırektory  Rınad Temirbekov, qalalyq ákimdik ókilderi qatysty. Sharany ashqan Dúısen Merǵalıev  bul SHQO turǵyndaryna syılyq retinde usynylǵan ekinshi balabaqsha bolatynyn aıtty.

«Osyǵan deıin Semeıge 160 orynǵa shaqtalǵan balabaqshany syılaǵanbyz. Bıyl Qazaqstandaǵy AES jumysyna 20 jyl. Aǵymdaǵy jyly Óskemen JEO №12 týrboagregaty ǵana qoldanysqa engizilip qoımaı, sonymen qatar osy mańyzdy áleýmettik joba júzege asatyny qýantady».