Astana ákimi Áset Isekeshev qala turǵyndary men qonaqtarynan tolassyz jaýǵan jańbyr saldarynan bolǵan qolaısyzdyqtar úshin keshirim surady, - dep habarlaıdy Qamshy.kz.
Óziniń Feısbýk jelisindegi paraqshasynda qala basshysy káriz júıeleriniń qurylys qarqynynan keıin qalyp kele jatqanyn jazdy.
«Qurmetti astanalyqtar men qala qonaqtary! Nóser jańbyrdyń tolastamaýy saldarynan qala joldarynda týyndaǵan qolaısyzdyqtar úshin ákimdik atynan keshirim suraımyn. Elordanyń qaryshtap damýy qalanyń sýaǵar káriz júıeleriniń qurylys qarqynynan ilgeri kele jatqany nóserli kúnderi basty problemaǵa aınalyp otyr», - degen ákim sońǵy kúnderi Astanada jańbyrdyń bir aılyq mólsheri jaýǵanyn aıtady.
«Qazgıdromettiń habarlaýynsha sońǵy nóserli jańbyr kúnderi jańbyrdyń bir aılyq mólsheri jaýǵan eken. Búgingi tańda ákimdik qalyptasqan jaǵdaıdy tez arada retke keltirý úshin barlyq sharalardy qoldanýda. Qolda bar barlyq 107 dana arnaıy tehnıka jumyldyrylyp, sý basqan aýdandarda táýlik boıy sý soryp jatyr. Sońǵy kúnderi ǵana qosymsha sýsorǵylarmen 100 myń t.m. sý soryldy, tazartqysh ǵımarattar arqyly 150 t.m. sý ótti. Bizdiń komýnaldyq qyzmetter 300 km-ge jýyq kolektordy bosatý úshin endi bir táýlik kerek», - deıdi ol.
Turǵyndar men qala qonaqtarynan joldardyń ýaqytsha jabylýy sıaqty qolaısyzdyqtarǵa túsinistikpen qaraýdy suraǵan ol ákimdiktiń resmı aqparat kózderi arqyly turǵyndardy barynsha aqparattandyrýdy qolǵa alatynyn jazady.
Áset Isekeshev bul túıtkildi problemany sheshýdiń keshendi jobalary jasalǵanyn da aıtyp otyr.
«Byltyr nóser káriziniń qyzmetine baılanysty máselelerdi sheshýdiń jańa joldary ázirlendi. Naqtyraq aıtqanda, №31 kóshede sý tazartý qurylystaryn salý boıynsha jobalar iske asyryldy, «Myńjyldyqta» sý tazartý qurylystary iske qosyldy, sondaı-aq, Imanov kóshesindegi sorǵylardyń qýattylyǵy ulǵaıtyldy», - deıdi Áset Isekeshev.
Qala basshysy sondaı-aq: «Ústimizdegi jyly Omarov – Otyrar kósheleriniń qıylysyndaǵy kolektor qalpyna keltirildi, tamyzdyń sońyna deıin Turan dańǵyly men №27 kósheniń qıylysyndaǵy sý tazartý qurylystary salynyp bitedi. Munymen qosa, bıyl Kishi Taldykólden Esil ózenine sý jiberetin kolektor men Saýran kóshesindegi Rysqulov kóshesinen №31 kóshege deıingi nóser kárizi kolektoryn, sondaı-aq, Seıfýllın kóshesindegi PMK-86 sý tazartý qurylystaryn salý aıaqtalady, Turan dańǵyly men Syǵanaq kóshesiniń qıylysyndaǵy sý tazartý qurylystaryn qaıta jóndeý qolǵa alyndy. Qazirgi kezde Beısekov kóshesi men Qorǵaljyn tasjolynyń qıylysyndaǵy, logıstıkalyq ortalyq aýdany men Prıgorodnyı kentindegi sý tazartý qurylystaryn salý jumystary jalǵasýda. Úshqońyr kóshesinde qurylys jumystary bastalady. Tıisti jumystar qatty jańbyr jaýǵanda qaladaǵy jaǵdaıdy qalpyna keltirýge múmkindik beredi», - deıdi.
Ákim káriz júıesindegi túıtkilderdi sheshýge halyqaralyq mamandar men ınjenerler tobynyń jumyldyrylyp jatqanyn aıtady.
«Búginde máseleni júıeli túrde tutastaı qala boıynsha sheshý úshin halyqaralyq ınstıtýttarmen, ınjenerlermen jáne eksperttik toptarmen birlesip nóser kárizi júıelerin odan ári damytý baǵdarlamasymen jumys istep jatyrmyz. Tıisti jumystardyń nátıjelerin mindetti túrde kúzge qaraı qalalyq qoǵamdyq keńestiń talqylaýyna usynatyn bolamyz», - deıdi Áset Isekeshev.
