«Jer komısıasynyń búdjetin Erbolat Dosaevtyń jeke moınyna ilip, memlekettik qyzmetten alastatý qajet». Saıasatker, úkimet janyndaǵy jer reformasy jónindegi quqyqtyq jumys tobynyń jetekshisi Muhtar Taıjan osyndaı usynys tastady, – dep habarlaıdy Qamshy.kz.

Muhtar Taıjannyń burynǵy Ulttyq ekonomıka mınıstrine bulaı shúıligýi beker emes eken. Saıasatkerdiń aıtýynsha, bir ǵana Atyraý qalasynda ótken komısıa otyrysyna shamamen 5 mıllıon teńge qarajat ketken.

«Komısıanyń otyrystary búdjet úshin qymbat pa?» degen suraqqa jaýap bergen Muhtar Taıjan árbir komısıa múshesine jumsalatyn memleket qarjysynyń esebin jarıalady.

«Mysalǵa, Atyraýǵa deıin ushaq bıleti – 113 myń teńge. Qonaq úı – úsh táýlikke 75 myń, tamaq, kir jýý, kóılekti útikteý – 10 myń – táýliktik shyǵynnan tólenedi. Tolyǵymen derlik bir adamǵa – 200 myń teńge. Keshegi otyrysymyzǵa (23 shilde kúni Atyraýda ótken segizinshi otyrys – red.) komısıanyń 25 múshesi qatysty. Iaǵnı, is-saparǵa shamamen 5 mıllıon teńge aqsha ketti. Zaldy jalǵa alýdy, adamdardyń jumysyn aıtpaı-aq qoıaıyn», - degen ol budan basqa otyrystardyń da qazyna úshin ońaıǵa túspegenin aıtady.

«Basqa otyrystarymyzǵa 25 emes, 75 múshe qatysady. Iaǵnı, búginge deıin eń kemimen 40 mıllıon teńge memlekettiń qaltasynan ketti degen sóz», - deıdi M. Taıjan.

Osynshama qarajattyń suraýsyz ketpeýi kerektigin aıtqan saıasatker komısıa shyǵynyn «Jer kodeksine» engen daýly ózgeristerdi jasaǵan burynǵy Ulttyq ekonomıka mınıstri tóleý kerek dep sanaıdy.

«Nege bundaı shyǵyn paıda boldy? Sebebi, jer máselesi boıynsha sońǵy zań sapasyz bolǵandyqtan halyq oǵan qarsy shyqty. Bul zańnyń avtory kim edi? Erbolat Dosaev myrza, ózi muny moıyndap sol úshin otstavkaǵa ketti. «Otstavka» bolǵanda qazir memlekettik «Baıterek» qoryn basqaryp otyr. Meniń usynysym – Jer komısıanyń búdjetin Erbolat Dosaevtyń jeke moınyna ilip, memlekettik qyzmetten alyp tastaý, bolashaqta jolatpaý kerek. Bundaı aıyppul tolyǵymen ádiletti bolady dep sanaımyn», - deıdi ol.