Qytaı úkimeti BAQ-na jańalyqtardy kelisimsiz jarıalaýǵa tıym saldy. Eldegi iri onlaın kompanıalar tek dáıekti aqparattardy ǵana jarıalaı alady, - dep habarlaıdy Qamshy.kz.

 Endi qytaı ǵalamtorynda memlekettik aqparat quraldarynda jarıalanǵan habarlar men maqalalar ǵana shyǵady.  Jańa talap oryndalmaǵan jaǵdaıda medıa kompanıa aıyppul tóleıdi. Osy arqyly qytaı bıligi ınternet kompanıalarǵa aǵymdaǵy jańalyqtardy, atap aıtqanda saıasat, ekonomıkamen baılanysty jarıalymdardy, shet el jańalyqtary men áleýmettik máselelerdi qozǵaǵan maqalalardy ruqsatsyz jarıalaýǵa tıym saldy.

Bloomberg-tiń jazýynsha, bul Qytaı úkimetiniń eldegi barlyq aqparat quraldaryn tolyq baqylaýyna ákep soǵady. Buǵan deıin habarlanǵandaı, qytaı basshylyǵy mobıldi qosymshalarǵa baqylaýdy kúsheıtti. 1 tamyzdan bastap kúshine enetin jańa erejege saı Ǵalamtordaǵy aqparat isteri jónindegi memlekettik kanselárıa tarapynan el aýmaǵyndaǵy mobıldi qosymshalar qatań baqylanatyn bolady. Sondaı-aq, mobıldi qosymshalar satylatyn dúkender de tekseriledi. Jańa erejeler halyqty terorızm qaýpi, alaıaqtyq, pornografıa men aqparat urlyǵy, jalǵan aqparattardyń taralýy sıaqty qaterlerdi boldyrmaý úshin engizilgen. Búginde Qytaıda mobıldi qosymshalar dúkenderinde 4 mıllıonnan astam baǵdarlama satylýda.