Bıylǵy jyly 10 maýsymda Qaýipsizdik keńesiniń otyrysynda Memleket basshysy bergen tapsyrmany oryndaý maqsatynda Mádenıet jáne sport mınıstrligi basqa da memlekettik organdarmen birlese otyryp, birqatar zańnamalyq jáne uıymdastyrýshylyq-ınstıtýsıonaldyq sharalardy ázirledi. Negizgi jumys QR Ulttyq qaýipsizdik komıteti janynan qurylǵan jumys tobynyń aıasynda júrgizilgen. Qoldanystaǵy zańnamaǵa qajetti ózgerister men tolyqtyrýlar engizý – basym baǵyttardyń biri retinde qarastyryldy. Bul týraly QR Mádenıet jáne sport mınıstrligi Din isteri komıteti tóraǵasynyń orynbasary Baqytjan Kúlekeev aıtyp otyr, - dep habarlaıdy Qamshy.kz BNews.kz – ke silteme jasap.

Jalpy, komıtet ókiliniń aıtýynsha, qoldanystaǵy zań normalary ulttyq qaýipsizdikke qaıshy keletin dinı qyzmetti toqtatýǵa múmkindik beredi. Sonymen birge, osy quqyqtyq múmkindikter odan ári jetildirýdi qajet etedi.

«Zańnamadaǵy bizdiń usynystarymyz mısıoner retinde tirkelmegen dinı ilimderdi taratý jónindegi qyzmetke jol bermeýdi kózdeıdi. «Dinı qyzmet jáne dinı birlestikter týraly» zańdaǵy mısıonerlik qyzmetke qatysty normany aýystyrýdy usyndyq. Bul dinı ilimdi taratatyn, ásirese mısıoner retinde tirkelmegen radıkaldy dinı aǵymdardyń jolyn qýýshylardy jaýapkershilikke tartýǵa múmkindik beredi», - deıdi B.Kúlekeev.

Aıta ketsek, arnaıy organdardyń málimeti boıynsha, búgingi tańda elimizde 15 500-16 000 shamasynda jat dinı aǵym ókili bar. 

Budan bólek, dinı mazmundaǵy aqparattyq materıaldardy, dinı ádebıetterdi daıyndaý, basyp shyǵarý, taratý jáne ákelýge baqylaý kúsheıtilmek. Onyń aıtýynsha, qosymsha norma zańnamadaǵy kemshilikterdi joıady.

«Zańnyń 9-baby 3-tarmaǵyna sáıkes dintaný saraptamasyn júrgizbesten ákelinetin ádebıetterdiń sandyq kórsetkishin engizý tıisti ádebıetti ákelý prosesin retteıdi dep oılaımyz. Osy quqyqtyq kemshilikti joıý, álbette, quqyqqa qaıshy keletin, sonyń ishinde ekstremıstik mazmundaǵy dinı materıaldardy anyqtaıtyn baqylaý júıesin jetildiredi», - deıdi ol.

Taǵy bir mańyzdy másele – dinı týrızmdi júzege asyrý tártibin retteý. Osy rette, «Týrısik qyzmet týraly» zańǵa azamattardyń shetelge qajylyqqa barý tártibin memlekettik organdar anyqtaıtyn normalar engizý kózdelip otyr.

«Osylaısha, qajylyqqa barǵan azamattarymyzdyń radıkaldy ıdeologıamen ýlaný múmkindigin aıtarlyqtaı qysqartamyz. Jalpy, biz usynǵan zańnamalyq sharalar vedomstvoaralyq jumys tobynda biraýyzdan qabyldandy», - deıdi Din isteri komıteti tóraǵasynyń orynbasary.

Sonymen qatar, mınıstrlik uıymdastyrýshylyq-ınstıtýsıonaldy baǵyttaǵy keshendi sharalardy júzege asyrmaq. Birinshiden, 1 jeltoqsanǵa deıin dinı jınalystardy jáne joralardy júrgizý, mısıonerlik qyzmet etý, sonymen birge, eldegi dinı ádebıetterdiń aınalymy máseleleri boıynsha zańnamany buzýǵa jol bermeý týraly turǵyndar arasynda qosymsha aqparattyq jáne túsindirý jumystaryn júrgizý josparlanǵan.

«Ekinshiden, İshki ister mınıstrligimen birlese otyryp, dinı jınalystardy ótkizý, qulshylyq etý, dinı joralar men rásimder júrgizý, mısıonerlik qyzmet pen dinı ádebıetterdiń aınalymyna baqylaýdy qamtamasyz etý boıynsha memlekettik organdar úshin ádistemelik usynymdardy ázirleý kerek. Jalpy, din salasyndaǵy máselelerdi retteý boıynsha basqa da memlekettik organdarmen tıisti jumystar júrgizilýde jáne osy qolǵa alynyp otyrǵan keshendi sharalar óz nátıjesin beredi dep sanaımyz», - deıdi komıtet ókili.

Eske sala keteıik, Aqtóbedegi oqıǵadan keıin Ulttyq qaýipsizdik komıteti ekstremızm men terorızmge qarsy kúres jónindegijańa zań jobasyn ázirledi. Atalǵan zań jobasy alty kodeks pen 18 zańǵa túzetý engizýdi kózdeıdi.

Osylaısha, ekstremıstik jáne terrorlyq sıpattaǵy qylmystar úshin jaza kúsheıtilmek. Budan bólek, shetelge soǵysýǵa ketken adamdar Qazaqstan azamattyǵynan aıyrylýy múmkin.

Sondaı-aq, QR İshki ister mınıstri málimdegendeı, jyl sońyna deıin polıseıler men áskerı qyzmetshilerdiń áskerı daıyndyǵy men moraldyq-psıhologıalyq jaǵdaıy tekserilmek.