Saıasattanýshy Rýslan Janǵazy qylmystyq-atqarý júıesi mekemelerin İshki ister mınıstrliginen alyp, Ulttyq qaýipsizdik komıteti quzyryna berýdi usyndy, - dep habarlaıdy Qamshy.kz.

«Qazaqstannyń quqyqqorǵaý júıesin reformalaý aıasynda qylmystyq-atqarý júıesin modernızasıalaý týraly oılanýdy usynamyn. Sol baǵyttaǵy sharalardyń biri retinde Qylmystyq-atqarý júıesi komıtetin (QAJK) basqa memlekettik organ quzyryna berý usynylady», - dep jazady saıasattanýshy.

«Túzeý mekemeleriniń qyzmetkerleri ondaǵy jedel ahýaldy baqylaý men dinı ekstremızmniń taralýyna qarsy turý jónindegi mindettermen tıimdi aınalysa almaı otyrǵanyn» aıtqan ol «QAJK İİM quramynda qalsa tym dóreki jumys isteıdi, al, Ádilet mınıstrligine ótse tym jumsaqtyq tanytady» dep sanaıdy.

«Neǵurlym tıimdi jol – QAJK-ni UQK quramyna berý», - deıdi.

«Sońǵy, Almatyda bolǵan teraktini taldaý kúdiktiniń salafıttermen kolonıada baılanysqa túskenin kórsetti.

QAJK-niń UQK-ge ótýi sottalǵandardyń ıdeologıalyq óńdeý jáne yqtımal ındoktrınasıasy kezeńinde dinı ekstremızmniń aldyn alýǵa baǵyttalǵan jedel jumys júrgizýge múmkindik berer edi, - dep sanaıdy Rýslan Janǵazy.

Saıasattanýshynyń oıynsha, osyndaı júıe ornasa, jıhad jolyna túsýi múmkin sottalǵandardyń bostandyqqa shyǵýyna tosqaýyl qoıylady.

Sondaı-aq, UQK-ge dinı ekstremızm, terorızm baptary boıynsha sottalǵandardy tolyq oqshaýlaýdy qamtamasyz etý kerektigin usynady.

Saıasattanýshy bul usynysy júzege assa, arnaıy kontıngenttiń ıdeologıalyq turǵyda «ýlaný» qaýpi azaıyp, qaterli áleýmettik vırýstyń bostandyqqa shyǵýyna tosqaýyl qoıylatynyna senimdi.