AQSH prezıdenti Barak Obama, sársenbi kúni keshkisin Demokratıalyq partıa sezinde sóılegen sózinde, amerıkalyqtardy el prezıdenttigine Hılları Klıntondy saılaýǵa shaqyrdy. Obama segiz jyl buryn bastaǵan jumysyn Klınton aıaǵyna deıin jetkizedi dep esepteıdi, - dep habarlaıdy Qamshy.kz centralasian.org – ke silteme jasap.

Prezıdent Obama buǵan deıin Klıntonnyń memlekettik hatshy qyzmetin atqarǵanda, AQSH qaýipsizdigine mańyzdy máseleler boıynsha, mysaly, Ál-Qaıda terrorlyq júıesiniń basshysy Ýsama bın Ladenniń kózin joıý operasıasyn talqylaǵanda jınaǵan tájirıbesine kóbirek toqtalyp, prezıdent bolýǵa laıyqty saıasatkerge aınalǵanyn atap ótti.

«Jaǵdaı shıelenisip turǵan sátte de ol jurttyń pikirlerine qulaq asady, salqynqandylyq tanytady, basqalarǵa qurmetpen qaraıdy... Ol - Hılları Klınton. Men ony jaqsy bilemin jáne qatty syılaımyn. Sol sebepti, men AQSH prezıdenttigine el tarıhynda odan asqan laıyqty er nemese áıel úmitker bolǵan emes dep nyq senimmen aıta alamyn», - dep málimdedi Barak Obama.

Obama úshin bul erekshe kún boldy. Osydan 12 jyl buryn Illınoıstyń sol kezde asa tanymal emes senatory demokrattar sezindegi jalyndy sózderimen kópshiliktiń esinde qalǵan edi. Sársenbi kúni ol amerıkalyqtardyń úmitin taǵy úkilep ótti. «Men biletin Amerıka bolashaǵyna zor úmitpen qaraıdy. Men biletin Amerıka tártip pen berekeni jaqtaıdy», - dedi prezıdent