Otandyq avtoındýstrıa – valúta naryǵyndaǵy turaqsyzdyq pen makroekonomıkalyq jaǵdaıdyń tómendeýinen eń kóp zardap shekken salalardyń biri. Bıylǵy jyldyń alty aıynda otandyq jeńil avtokólikterge suranys 60 paıyzǵa azaıǵan. Bul týraly búgin Ortalyq komýnıkasıalar qyzmetinde ótken baspasóz máslıhatynda «QazAvtoÓnerkásip» ZTB basqarma tóraǵasy Oleg Alferov jetkizdi, - dep habarlaıdy Qamshy.kz BNews.kz-ke silteme jasap.

«Bıylǵy jyldyń alty aıynyń qorytyndysy boıynsha resmı dılerler 20,8 myń jeńil kólik satqan. Ótken jyldyń sáıkes kezeńinde bul kórsetkish 52 myńdy quraǵan bolatyn. Jeńil avtokólikterge suranys 60 paıyzǵa qysqaryp otyr. Bul avtoónerkásiptegi salalyq kórsetkishterdiń qysqarýyna basty sebep boldy», - dep habarlady O.Alferov.

Degenmen, onyń aıtýynsha, mamyr-maýsym aılarynda jaǵdaı túzele bastaǵan sekildi. Sondyqtan ekinshi jartyjyldyqta avtoónerkásip kórsetkishteri jaqsarady degen úmit bar.

«Otandyq avtoındýstrıa – valúta naryǵyndaǵy turaqsyzdyq pen makroekonomıkalyq jaǵdaıyń tómendeýinen eń kóp zardap shekken salalardyń biri. Desek te, búginde biz jaǵdaıdyń túzele bastaǵanyn baıqap otyrmyz. Bul rette avtoónerkásip salasyndaǵy otandyq kásiporyndar kórsetkishteriniń tómendeýine jańa avtokólikter naryǵyndaǵy belsendiliktiń tómendeýi sebep bolǵanyn atap ótý kerek. Eger naryqtaǵy satylym kólemi qysqarsa, avtomobıl shyǵarý kólemi de qysqarady», - dedi ol.

Jalpy, elimizde jyl basynan beri 36,6 mlrd teńgege 3 772 avtokólik shyǵarylǵan. Bıylǵy jyldyń qańtar aıynda otandyq kásiporyndar 404 kólik qana qurastyrsa, shilde aıynda bul kórsetkish 1136-ǵa jetken.