Azattyq úshin arpalysqan Mustafa Shoqaıdyń 1936 jyly jazyp alynǵan daýysy 2016 jyldyń 20 shildesi kúni áleýmettik jelige shyǵaryldy. Túrkistan jastaryna aıtylǵan úndeýde birlik pen bereke bolsa, túrki dúnıesine syrttan eshqandaı kúshtiń áser ete almaıtyndyǵy baıandalady, - dep habarlaıdy Qamshy.kz Stan.kz-ke silteme jasap.

«Alysta júrip, el qaıǵysyn oılap, Eýropanyń ár tarabynda júrgen, búgingi Túrkıada turǵan Túrkistan jastary, birlesińder. Senderdiń birlikteriń, senderdiń bir-birlerińe kúsh qosýlaryń elimizdiń baqytyna qyzmet etpek. Muny umytpańdar. Bárimizdiń qubylamyz – ózimizdiń atajurtymyz, ólkemiz Túrkistan bolmaq. Túrkistan úshin ólý, Túrkistan úshin jan berý – bárimizge bir maqsat, bir muqabbat ýázıpa bolmaq. Muny umytpaý kerek.

…Túrik halqy – batyr halyq. Túrik halqy – arystan er halyq. «Kimnen taıaq jegendeı bizdiń túriktiń balasy, aldyryp júrgen dushpanǵa aýzynyń alasy» bul naqyl sózdi umytpaýymyz kerek. Bárimiz bir bolsaq, bizdiń jeńbeıtuǵyn jaýymyz bolmaıdy, maqsatymyzǵa jetemiz! Onsyz bizdiń kúnimiz joq, quryp ketemiz. Túrik balasy, umytpańdar, bastaryńdaǵy bóten eldiń ókimetin shyǵaryp tastaýǵa, aýdaryp tastaýǵa tyrysyńdar!», – dep jazylǵan úndeýde.