29 shilde Halyqaralyq jolbarystar kúninde BUU-nyń qorshaǵan orta jónindegi baǵdarlamasy (IýNEP) atalmysh sútqorektilerdi qorǵaý jáne jabaıy ańdardy zańsyz saýdalaýmen kúresý jóninde keń aýqymdy kampanıany bastady, - dep habarlaıdy Qamshy.kz.
Búgingi tańda dúnıejúzinde ne bári 3000 jolbarys qalǵan. Sońǵy 100 jylda jolbarys túrleriniń 97 paıyzy joıylǵan. Bul haıýandar tuqymynyń jedel quryp bara jatýyna zańsyz saýda basty sebep bolyp otyr. Jolbarystyń dene múshelerinen jasalǵan dári-dármek pen túrli áshekeı zattar qara bazarda qymbat baǵaǵa satylady.
«Ár adam, meıli polıseı bolsyn, kedenshi, depýtat, qaýym jetekshisi, prokýror, sýdıa nemese qarapaıym azamat bolsyn, jabaıy ańdar saýdasynyń aldyn alýda atqaratyn róli bar. 2030 jylǵa deıingi Turaqty Damý maqsattaryn júzege asyrýda ańdardyń zańsyz saýdasyna qarsy naqty sharalar qabyldaý qajet» dedi, IýNEP-tiń aımaqtyq basshysy Izabel Lýıs.
Jabaıy ańdardyń zańsyz saýdasy álem boıynsha nómiri birinshi qaýip bolyp otyr. Bıyl maýsym aıynda Taıland polısıasy býdda monastiriniń muzdatqysh kamerasynan 70 jańa týylǵan jolbarystyń súıegin tapqan. Sondaı-aq basqa da jabaıy haıýandardyń terisi men dene múshelerinen jasalǵan talısmandardyń jasyrylǵany anyqtalǵan.
BUU-na qarasty atalmysh baǵdarlama mamandary jabaıy tabıǵatqa jasalǵan qastandyqtar ulttyq damýdy úzedi jáne mıllıardtaǵan dollar qarajattyń halyqaralyq qylmystyq toptardyń «qaltasyna» túsýine kómektesedi dep dabyl qaǵýda. Sondyqtan BUU búkil álem jurtshylyǵyn haıýanattardy qorǵaýǵa úndeı otyryp, jabaıy tabıǵatqa qastandyq jasaýǵa qarsy birigip kúresýge shaqyrady.
Sharafat Jylqybaeva
