«Mitsubishi Electric Corp» kompanıasy jańa ınovasıalyq tehnologıalardy synaqtan sáti ótkizdi» dep jazady «DailyTechInfo»  agenttigi. 

632 metrlik Shanhaı munarasyna ornatylatyn lıfttiń jańa túri mınýtyna 1230 metr jyldamdyqpen qozǵalady. Bul lıfttiń ereksheligi sonda, lıft tómen túskende jáne toqtaǵanda elektrqozǵaltqyshy generator rólin atqarady. Sonyń arqasynda lıft joǵary kóterilgende shyqqan energıa qaıta qalpyna keledi. Qondyrǵynyń jańa tehnologıaǵa negizdelgen tejegishtik júıesi qaýipsizdik sharttaryna tolyq saı.

Bul lıft birneshe púlttyń kómegimen  paralel operasıalyq júıe  arqyly basqarylady. Al trosy  joǵary jyldamdyqtaǵy basqa lıft trostarynan da myqtyraq. Jańa qurylymda jedel toqtatý, jyldamdyqty rettegish sıaqty qorǵaý jáne qyzmetti baqylaý fýnksıalaryn atqaratyn qondyrǵysy bar. Jańa júıe negizinde qurastyrylǵan lıft esh dirildemeıdi. Oǵan qosa kabına  ishindegi qondyrǵy aýa qysymyn rettep turady. Jańa lıft tómengi qabat pen joǵarydaǵy kórý alańyn baılanystyryratyn úshinshi lıft sanalady.

Shanhaıdaǵy bul lıftpen jer asty qabatynan 119-shy qabatqa bar bolǵany 53 sekýndta kóteriledi eken. Jańa lıft qondyrǵylarymen qosa Japonıadaǵy «Mitsubishi Electric Inazawa Works» kompanıasynyń zaýytynda jasalǵan. Al montajdaý jumystaryn Qytaıǵa tanymal «Shanghai Mitsubishi Elevator Co Ltd» kompanıasy atqarady.

Dana Qamshybek